'वजनदार' इमान अहमदचा अबुधाबीत मृत्यू

मटा ऑनलाइन वृत्त । दुबई

जगातील सगळ्यात वजनदार महिला म्हणून सुपरिचित असलेल्या इमान अहमदचा अबुधाबी येथे मृत्यू झाला आहे. गेल्याच आठवड्यात तिचा ३७ वा वाढदिवस साजरा करण्यात आला होता. अनेक व्याधींनी ग्रासलेल्या इमानचा हृदयविकार बळावल्यानं आणि मूत्रपिंड निकामी झाल्यानं तिची प्राणज्योत मालवल्याचं बुर्जिल हॉस्पिटलच्या डॉक्टरांनी सांगितलं.

इमान अहमद अब्दुलाती ही मूळची इजिप्तची रहिवासी होती. एलिफेंटायसिस या आजारामुळे लहान वयातच तिचं वजन वाढत-वाढत ५०० किलोच्या पलीकडे गेलं होतं. त्यामुळे तिची हालचाल पूर्णपणे बंद झाली होती आणि मधुमेह, रक्तदाब, हृदयविकार, मेंदूविकार यासारखे आजार तिला जडले होते. आर्थिक परिस्थिती बेताची असल्यानं तिला उपचारही घेता येत नव्हते. परंतु, गेल्या वर्षी मुंबईतील सैफी हॉस्पिटलने तिच्यावर उपचाराची तयारी दाखवल्यानं तिच्या आयुष्यात आशेचा किरण डोकावला होता.

याच वर्षी फेब्रुवारी महिन्यात ५०४ किलो वजनाची इमान कार्गो विमानातून मुंबईत पोहोचली होती. बॅरिएट्रिक सर्जरीद्वारे तिचं वजन शक्य तेवढं कमी करण्याचं आव्हान डॉ. मुफ्फजल लकडावाला यांच्या टीमनं स्वीकारलं होतं. त्यांच्या प्रयत्नांना यशही आलं. सर्जरी आणि वेगवेगळ्या थेरपींमुळे तीन महिन्यांत इमानचं वजन ३०० किलोहून अधिक घटलं होतं. डॉक्टरांच्या या कामगिरीचं जगभरातून कौतुक झालं, पण इमानच्या बहिणीनं - शायमानं त्यांच्यावरच आरोप केला होता. इमानच्या वैद्यकीय अहवालावर तिनं शंका उपस्थित केली होती. त्यानंतर, इमानला अबुधाबीला हलवण्यात आलं होतं.

मुंबईत येताना ५०४ किलो वजनाची असलेली इमान जाताना १७१ किलोची झाली होती. त्यामुळे कार्गोऐवजी एअरबस -३०० मधून ती अबुधाबीच्या बुर्जिल हॉस्पिटलमध्ये पोहोचली होती. तिथेही तब्बल २० डॉक्टरांचं पथक तिच्यावर विविध उपचार करत होतं. पण, आज पहाटे इमाननं अखेरचा श्वास घेतला.