चीनमध्येही आता स्वच्छ चीन अभियानाचे वारे!

मटा ऑनलाइन वृत्त । मुंबई

भारतातल्या 'स्वच्छ भारत अभियाना'चे वारे चीनमध्येही वाहू लागले आहेत. चीनमधल्या शौचालयांमध्ये स्वच्छतेचे काटेकोर पालन करण्याचा फतवाच निघाला आहे. चीनचे राष्ट्राध्यक्ष शी जिनपिंग यांनी देशभरातले टॉयलेट्स अद्ययावत करण्याचे आदेश सोमवारी सर्व अधिकाऱ्यांना दिले.

स्वच्छ टॉयलेट्स निर्माण करणे हा शहरी आणि ग्रामीण लोकांची जीवनशैली सुधारण्यासाठी करावयाच्या प्रयत्नांपैकी एक महत्त्वाचा प्रयत्न आहे. २०१६ मध्ये ज्या देशांमध्ये सर्वाधिक पर्यटक गेले त्या टॉपच्या ४ देशांमध्ये चीनचा समावेश आहे. चीनमध्ये २०१६ मध्ये ५ कोटी ९३ लाख पर्यटक आले होते.

यावर्षी ऑक्टोबर अखेरपर्यंत चीनच्या पर्यटन स्थळांवरील ६८ हजार शौचालये अद्ययावत करण्यात आली आहेत. हे प्रमाण ठरवलेल्या उद्दिष्टापेक्षा १९.३ टक्के अधिक होतं. २०१५ मध्ये चीनने 'शौचालय क्रांती' सुरू केली होती. त्याअंतर्गत २० अब्ज युआन इतका खर्च करत हे ६८ हजार टॉयलेट्स अद्ययावत करण्यात आले. शी जिनपिंग म्हणाले, 'शौचालय ही लहान समस्या नाही. एक सभ्य ग्रामीण-शहरी वातावरण तयार करण्यासाठी शौचालये स्वच्छ असणं गरजेचं आहे.'