५० कोटी युजर्सची माहिती चोरी

वॉशिंग्टन : सन २०१४मध्ये आपल्या सुमारे ५० कोटी युजर्सची माहिती चोरण्यात आल्याची माहिती याहू कंपनीने दिली आहे. जगातील या सर्वांत मोठ्या सायबर चोरीमागे एखाद्या देशाचा हात असल्याचा आरोपदेखील याहूने केला आहे.

सन २०१४च्या अखेरीस सुमारे ५० कोटी युजर्सची माहिती हॅकिंगद्वारे चोरण्यात आल्याचे याहूने केलेल्या तपासात निष्पन्न झाले आहे. चोरण्यात आलेल्या माहितीमध्ये युजर्सची नावे, ई-मेल पत्ता, टेलिफोन क्रमांक, जन्मतारीख, पासवर्ड तसेच सुरक्षा प्रश्नोत्तरांचा समावेश असल्याचे याहूने जाहीर केले आहे. सुदैवाने असुरक्षित पासवर्ड, पेमेंट कार्ड डेटा, बँक खात्याची माहिती कंपनीच्या सिस्टीममध्ये जपून ठेवली जात नसल्याने अशा माहितीची चोरी होऊ शकली नसल्याचे याहूने म्हटले आहे.