वृत्तसंस्था, लंडन
लॉकडाउननंतर व्यवहार पूर्ववत करण्याच्या मोहिमेचा भाग म्हणून प्राणी संग्रहालये, उद्याने, ड्राइव्ह इन थिएटर खुली करण्याचा निर्णय ब्रिटन सरकारने घेतला आहे. शाळा मात्र सध्या बंदच राहतील.
सरकारचा हा निर्णय नागरिकांना फारसा पसंत पडलेला नाही. उन्हाळ्यापूर्वी शाळा सुरू करण्यात अपयश आल्याबद्दल पंतप्रधान बोरिस जॉन्सन यांच्यावर जोरदार टीका करण्यात येत आहे. सध्या अत्यावश्यक सेवांतील कर्मचाऱ्यांच्या मुलांसाठी शाळा सुरू आहेत, मात्र सर्वच मुलांनी येत्या काळात घरूनच शिकावे, असा सरकारचा आग्रह आहे. शाळांमध्ये सुरक्षित वावराचे पालन करण्यासाठी पुरेशी जागा नसल्यामुळे ही भूमिका सरकारने घेतली आहे. या संदर्भात पंतप्रधान जॉन्सन लवकरच निर्णय घेण्याची शक्यता आहे.
मात्र, देशातील प्राणी संग्रहालये, उद्याने, सफारी पार्क आदी कौटुंबिक सहलींसाठी लवकरच खुली केली जातील, असे पंतप्रधानांच्या कार्यालयातून सांगण्यात आले. या निर्णयामुळे कुटुंबांना काही वेळ विरंगुळा उपलब्ध होईल, असेही सरकारने म्हटले आहे.
प्राणी संग्रहालयांबाबत तातडीने निर्णय न घेतल्यास ती कायमची बंद करावी लागतील, असा इशारा प्रसिद्ध 'लंडन झू'सह ब्रिटनमधील इतर संग्रहालयांनी दिला आहे.