डायनाच्या पत्रांचा होणार लिलाव

खास मैत्रीण कॅरोलिनला लिहिलेल्या मजकुरातून खासगी आयुष्याचा उलगडा

वृत्तसंस्था, बोस्टन
युवराज्ञी डायना हिच्या मृत्यूनंतर दोन दशकांनीही तिच्या आयुष्याविषयी जगभरात असलेले कुतूहल कमी व्हायला तयार नाही. आता डायनाच्या संग्रहातील ३३ खासगी पत्रांचा लिलाव होऊ घातला असून, या लिलावात पत्रांना सुमारे सव्वा लाख पौंड (अंदाजे एक कोटी सहा लाख रुपये) एवढी किंमत मिळण्याची शक्यता आहे.
युवराज्ञी डायना हिने तिची मैत्रीण कॅरोलिन प्राइड बार्थोलोम्यू हिला १९७८ ते १९९७ या काळात वेळोवेळी लिहिलेली ही ३३ पत्रे आहेत. डायनाचा विवाह प्रिन्स चार्ल्ससोबत होण्यापूर्वी ती आणि कॅरोलिन एका फ्लॅटमध्ये सोबत राहत होत्या. त्यांची पहिली भेट त्यांच्या वयाच्या १२ व्या वर्षी वेस्ट हेल्थ स्कूल येथे झाली. या पत्रांद्वारे डायनाच्या खासगी जीवनातील अनेक अप्रकाशित पैलूंवर प्रकाश पडण्याची शक्यता आहे. मैत्रिणीला लिहिलेल्या या पत्रातून डायनामधील मनस्वी तरुणीचे दर्शन होते. प्रिन्स चार्ल्सबरोबर बिघडलेले संबंध, अडचणीत आलेले लग्न, घटस्फोट, वैयक्तिक आयुष्यात जाणवणारी असुरक्षितता अशा अनेक गोष्टी डायनाने मैत्रिणीला पत्रातून कळविल्या आहेत. अमेरिकेतील आर. आर. ऑक्शन हाउस या लिलावगृहातर्फे या पत्रांच्या लिलावाचे आयोजन करण्यात आले आहे. येत्या १८ ऑगस्टपासून ऑनलाइन लिलाव प्रक्रियेस प्रारंभ होणार आहे.
या पत्रांमधून जानेवारी १९८० ते जानेवारी १९८२ या डायनाच्या आयुष्यातील दोन वादळी वर्षांचा आणखी तपशील समजू शकेल, असा अंदाज आहे. या काळातच डायनाचे प्रिन्स चार्ल्स यांच्यासोबत लग्न ठरले. या दाम्पत्याचा तेव्हा जगभर गाजलेला शाही लग्नसोहळा, नंतर तीन महिने चाललेला हनीमून, डायनाचे पहिले गर्भारपण या घटना या काळात घडल्या होत्या. डायनाच्या त्या काळातील अस्वस्थ मनःस्थितीचे दर्शन या पत्रांद्वारे घडत असल्याचे लिलावगृहातर्फे सांगण्यात आले. विशेषतः लग्नानंतर लगेचच दोघांमधील दुरावलेले संबंध आणि त्याला जबाबदार असलेल्या कॅमिलाचा अप्रत्यक्ष उल्लेख या पत्रांमधून दिसून येतो. (आता कॅमिला यांचा प्रिन्स चार्ल्स यांच्यासोबत विवाह झाला आहे.) याखेरीज डायना तिचे वजन, तिला वाटणारी असुरक्षितता, वाढते औदासीन्य आणि माध्यमांचा खासगी जीवनातील वाढता हस्तक्षेप याबद्दल मैत्रिणीकडे या पत्रांतून मन मोकळे करताना दिसते.

‘वजन कमी झाले आहे...’

‘आता मला ३२ ऐवजी २९ इंची जीन्स बसते. वजन कमी झाले आहे. पण अजून बरेच काही घडायचे आहे...’ असे डायनाने एका पत्रात लिहिले आहे. या ३३ पत्रांपैकी यातील २८ पत्रे डायनाने स्वतःच्या हस्ताक्षरात लिहिली आहेत. एकूण १०९ पाने भरतील एवढा हा मजकूर आहे. या पत्रांपैकी २६ पत्रांवर डायनाने ‘डायना’ अशीच स्वाक्षरी केली असून, एका पत्रावर ‘डी’, तर एका पत्रावर ‘मी (me)’ अशी स्वाक्षरी केली आहे.