जॉली एलएलबी-२

अर्शद वारसीचा जॉली एलएलबी आला तेव्हा या सिनेमाचं खूप कौतुक झालं होतं. या सिनेमाचं बजेट कमी होतं. कामं सगळ्यांची चांगली झाली होती. तरी यातला मोठा यूएसपी होता तो यात दाखवलेलं कोर्ट. म्हणजे हिंदी सिनेमात कोर्ट रुम ड्रामा नवीन नाही. साधारणपणे अशा सिनेमात न्यायाधीशाच्या अंगावर धावून जाणारा नायक वकील दिसतो किवा न्यायालयाच्या कामकाजावर ताशेरे ओढत तारीख पे तारीख असं बेंबीच्या देठापासून ओरडणारीही काही मंडळी रंगवली गेली. पण या सिनेमात मात्र कोर्टाचं वास्तदर्शीं रुप मांडण्याचा प्रयत्न झाला होता.

सिनेमा सुपर ‌डुपर हिट झाला नसला तरी याचं कौतुक झालं होतं. त्या सिनेमाच्या दिग्दर्शकाने आता या सिनेमाचा सिक्वेल आणलाय. जॉली एलएलबी २. आता हे कथानक लखनौमध्ये येतं. या सिनेमातही एक केस घेऊन त्याभोवती सिनेमा बांधण्यात अलाय. तिकडे अर्शद वारसी होता. इकडे अक्षयकुमार आहे. तिकडे बोमन ‌इराणी होते. इकडे अन्नू कपूर आहेत. याशिवाय कोर्टात घडणाऱ्या अनेक गोष्टींमुळे जुन्या एलएलबीची आठवण होते. यातली केस वेगळी असल्यामुळे या नव्या भागात नाविन्य आबाधित राहातं. उत्तम कलाकार निवड, खुसखुशीत संवाद आदी बाबींमुळे जॉली एलएलबीप्रमाणे हा जॉलीही आपले पैसे वसूल करतो. तुलनेने नव्या जॉलीमध्ये पटकथेत येणारे काही ट्रॅक अचानक गायब होतात. सिनेमॅटिक लिबर्टींच्या नावाखाली दिग्दर्शकाने बरंच स्वातंत्र्य उत्तरार्धात घेतलंय, तेही जरा खटकतं..