UP Election Results 2022 Highlights : उत्तर प्रदेशात कमळाची कमाल, सायकल पंक्चर, हात-हत्ती दोन्हींची दाणादाण

मुंबई : मान्सूनमधला पाऊस बरसावा तशी योगी आदित्यनाथ आणि त्यांच्या साथीदारांवर मतं बरसली आहेत. सगळ्याच एक्झिट पोलने उत्तर प्रदेशात शत प्रतिशत भाजप येईल, असा विश्वास व्यक्त केला होता. अगदी तसंच झालंय, भाजपने ४०३ जागांपैकी २५० च्या वर जागांवर आघाडी मिळवलीय. योगींच्या याच विजयाची चर्चा संपूर्ण भारतभरात आहे. योगींनी दुसऱ्यांदा सत्तेत येण्याचा करिश्मा कसा साधला, निवडणुकीदरम्यान आणि निकालाची ठळक वैशिष्टे काय आहेत, हे आपण १० पॉइंटर्समधून समजून घेऊयात...


-३७ वर्षांमध्ये कोणत्याही पक्षाला सलग दुसऱ्यांना राज्याची सत्ता काबीज करणं शक्य झालं नव्हतं. योगींनी करुन दाखवलं
-२०१७ नंतर पुन्हा २०२२ मध्ये सलग दुसऱ्यांदा निर्विवाद बहुमत मिळवत भाजपचा ऐतिहासिक विजय
-भाजपने हिंदुत्वाची मोठी व्होटबँक तयार करण्यात यश मिळवलं. याचा सर्वाधिक फायदा भाजपला उत्तर प्रदेश निवडणुकीत झाला
-राम मंदिर हा देशाच्या राजकारणात कायमच चर्चेत राहणारा मुद्दा, राम मंदिराच्या प्रत्यक्ष कामाला सुरुवात झाल्यानंतरची उत्तर प्रदेशातील ही पहिलीच मोठी निवडणूक, राम मंदिर निर्माणाचा खूप मोठा फायदा भाजपला झाला
-हिंदुत्वाचं राजकारण करताना भाजपने जातीय समीकरणे जुळवण्यावरही भर दिला
-सर्वसामान्य नागरिकांना थेट लाभ देणाऱ्या मोदी सरकारच्या योजनांचा योगींना मोठा फायदा
-बहुजन समाज पक्ष साफ अपयशी, दलितांची मतेही भाजपकडे वळाली
-भाजपची नियोजनबद्ध प्रचारयंत्रणा, केंद्रीय नेत्यांची कुमक, योगींची प्रतिमा आणि त्याला हिंदुत्ववादाची जोड
-आखिलेश यादव यांनी योगींना चांगली टक्कर दिली, मात्र योगींच्या सुस्साट गाडीला ब्रेक लावायला त्यांना जमलं नाही
-मोदींची हवा अजूनही असल्याचं या निवडणुकीतून स्पष्ट होतं