खण इन ‘फॅशन’! यंदाच्या दिवाळीला ट्राय करा खणाच्या साडीची हटके स्टाइल

नथीच्या डिझाइनप्रमाणे कपाळावरची चंद्रकोरही खणाच्या साड्यांवर उठून दिसत आहे. फिकट रंगाच्या खणाच्या साडीवर गडद मरून रंगाची चंद्रकोर खूपच खुलून दिसते. तसेच सरस्वतीची डिझाइन असलेल्या खणाच्या साड्यांनाही सध्या प्रचंड मागणी आहे. पांढऱ्या रंगाच्या धाग्यांनी विणलेल्या सरस्वतीच्या डिझाइनमुळे साडीला एक वेगळाच लूक मिळतो. याबरोबरच पदरावर पोपट, कलमकारी, स्क्वेअर अशा डिझाइन असलेल्या खणाच्या साड्याही बाजारात उपलब्ध आहेत. खास डिझाइन असलेल्या या खणाच्या साड्यांना मराठी अभिनेत्रींनी पसंती दिल्याचं दिसून येत आहे. अनेक अभिनेत्रींनी खणाच्या साडीवर खास फोटोशूट केलं आहे.

खणाच्या साडीप्रमाणे खणाचे कुर्ते, वनपीस यालाही अधिक पसंती मिळत आहे. यातही नथ, मोर, पोपट, कलमकारी पॅटर्नचे पॅचवर्क केलेले ड्रेस जास्त खुलून दिसतात. वनपीसमध्ये लॉँग आणि शॉर्ट असे दोन्ही प्रकार आहेत. काहीसे वेस्टर्न स्टाइलमध्ये हे वनपीस शिवले तर ते अधिक उठून दिसतात. हे ड्रेस रेडिमेड घेण्यापेक्षा खास डिझाइन करून शिवून घेण्याकडे मुलींचा ओढा आहे.

(Fashion Tips को-ऑर्ड ड्रेसची क्रेझ! का वाढतेय या स्टायलिश पॅटर्नची मागणी?)

पारंपरिक साडीला वेस्टर्न लूक कसा देता येईल याचा विचार हल्ली केला जातो. खणाच्या साडीप्रमाणे ब्लाउजवरही नथ, पोपट, कलमकारी अशी डिझाइन बघायला मिळत आहे. ब्लाउजसाठी खास या डिझाइनचे पॅचेस बाजारात उपलब्ध आहेत. ब्लाऊजच्या स्लीव्हज, गळ्याला हे पॅचेस लावले जातात. पारंपरिक लूकला थोडा वेस्टर्न टच देण्यासाठी ब्लाउजच्या डिझाइनमध्ये ऑफ शोल्डर, हायनेक, कोल्ड शोल्डर, बॅकलेस, स्लीवलेस असे विविध प्रयोग केले जात आहेत. त्यामुळे साडी जरी पारंपरिक असली तरी ब्लाउजच्या डिझाइनमुळे वेगळा आणि आकर्षक लूक येतो.

(Stylish Bag वेस्ट बॅग्सचा ट्रेंड भन्नाट)

सौंदर्यात भर घालणारा आणि स्त्रियांच्या जिव्हाळ्याचा विषय म्हणजे दागिने, ज्वेलरी. हल्ली पारंपरिक मोती, गोल्डन ज्वेलरीबरोबरच ऑक्सडाइज ज्वेलरीलाही पसंती दिली जात आहे. त्यातही चोकर, कानातले, नथ यांची चलती आहे. खणाच्या साडीवर तीन किंवा चार पदरी चोकर, त्यावर ठसठशीत कानातले, नाजूक नथ या ऑक्सिडाइज ज्वेलरीमुळे इंडो वेस्टर्न लूक दिसतो. या लूकला मुलींचीच नाही तर महिला वर्गाचीही पसंती आहे. कोणत्याही सण समारंभासाठी पारंपरिक आणि आधुनिक या दोन्ही लूकसाठी खण आणि त्यावर ऑक्सडाइज ज्वेलरी हा उत्तम पर्याय आहे.

(Diwali 2020 चंदेरी साज! दिवाळीसाठी हटके लुक हवाय? जाणून घ्या ऑक्सिडाइज्ड ज्वेलरीचा ट्रेंड)

खणाच्या साडीबरोबरच खणाच्या कापडाची पर्सही महिलांना आवडते. या पर्सही बाजारात उपलब्ध आहेत. पण सध्या कोरोनामुळे मास्क हा सगळ्यांच्या आयुष्यातील एक अविभाज्य भाग झालेला आहे. मध्यंतरी महिलांसाठी नथ, लिपस्टिक असलेल्या मास्कवरून अनेक जोक्स व्हायरल झाले. त्याप्रमाणे काही मास्क बाजारात आले आणि सध्या खणाच्या कापडाच्या मास्कला महिलांकडून विशेष मागणी आहे. सगळ्या रंगांमध्ये हे मास्क उपलब्ध आहेत.

(Diwali 2020 यंदा इंडोवेस्टर्न हिट! जाणून घ्या फॅशनमधील नवीन ट्रेंड)