मेकअप ‘आइस’सारखा!

आय मेकअप हा प्रत्येकीचा जिव्हाळ्याचा विषय! रोज घराबाहेर जाताना नवनवीन प्रयोग करून पाहायला, तर अनेकजणी प्राधान्य देतात. त्यात एखादी खास पार्टी असेल, तर विचारू नका. निरनिराळे रंग, आयशॅडो लावून डोळ्यांची चमक वाढवून स्वतःच्या नजरेनंच समोरच्याला घायाळ करण्यासाठी त्या एकदम तयार असतात. आजकाल सर्रास मुली आयलायनर आणि काजळ यांच्या जोरावर आपल्या डोळ्यांचं सौंदर्य आणखी वाढवताना दिसतात. तसंच, सध्या विविध प्रकारच्या आयमेकअपचाही ट्रेंड आहे. त्यातल्या त्यात आइस आयमेकअपचा प्रकार मुलींना आवडतोय.
हा प्रकार आत्ताआत्तापर्यंत फॅशन रॅम्पवर दिसायचा. स्मोकी आयप्रमाणे. आता तो पार्टींमध्येही दिसू लागलाय. बर्फासारखा किंवा केकवरच्या क्रीमसारखा असं त्याचं वर्णन करता येईल. यामध्ये लावण्यात येणारा आयशॅडो चकचकीत असतो. तुमच्या गडद पापण्यांना उठाव देत कोणत्याही पोशाखावर याप्रकारचा आय मेकअप उठून दिसतो. यासाठी आधी बेसला चंदेरी रंगाची शेड लावा. यामुळे डोळे आणखी आकर्षक दिसतील. नंतर या सिल्व्हर बेसवर तुम्ही हवा तो चमकदार रंग लावू शकता.
हा लूक मिळवण्यासाठी खास टिप्स
चेहरा स्वच्छ धुवून टोनर लावा आणि नंतर मॉइश्च्युराइज्ड करा.
टिश्यू पेपरनं डोळ्यांचा वरचा भाग आणि पापण्या टिपून घ्या. यामुळे तिथलं तेलाचं प्रमाण कमी होईल.
डोळ्यांभोवती थोडेसं फाउंडेशन लावा. त्यावर स्पाँजच्या मदतीनं चंदेरी रंग डोळ्यांवर पसरा. मग आयसी पिंक किंवा चंदेरीच्या आणखी गडद शेड्स घेऊन त्यावर लावा.
भुवयांपर्यंत हा आय शॅडो पसरवा. यामुळे डोळे उठावदार दिसतील. त्यांचा आकार मोठा झाल्यामुळे शॅडोचे कितीही थर असले, तरी ते बटबटीत दिसणार नाहीत.
गडद रंगाच्या मॅट फिनिश शॅडोचा एक ब्रश पापण्यांवरून फिरवा. यामुळे डोळ्यांभोवतीच्या सुरकुत्या आणि काळ्या वर्तुळांकडे दुर्लक्ष होईल.