फॅशनविश्वात काटकोन-त्रिकोण

आयत, त्रिकोण, काटकोन, चौकोन…हे सगळं वाचून भूमितीची आठवण आली ना? हे आकार सध्या फॅशनविश्वात महत्त्वाचं स्थान मिळवून आहेत. कपड्यांपासून ज्वेलरीपर्यंत सगळीकडे याचाच बोलबाला आहे…

गीता खेडेकर

शाळेत असताना तुम्हीही भूमितीचा अभ्यास केला असेल ना? शाळेचा अभ्यास संपल्यानंतर या आकृत्यांचा आणि तुमचा संबंध संपला असेल. भूमितीतल्या सगळ्या आकृत्या आता कपड्यांवर, दागिन्यांमध्येही पाहायला मिळतायत. फक्त प्रिंटच नव्हे तर भूमितीच्या या वेगवेगळ्या आकारांतले अनेक पर्याय ड्रेसमध्ये आले आहेत. या विविध आकारांतला ड्रेसचा गळा सध्या ट्रेंडमध्ये आहे. बूट, दागिने, स्लिंग यात हे आकार पाहायला मिळतायत. गोल, चौकोनी, त्रिकोण, आयत, षटकोन, शंकरपाळ्यांचा आकार या भूमितीमधल्या आकारांनी फॅशनच्या दुनियेत महत्त्वाचं स्थान पटकावलं आहे.

या आकारांत छोट्या-छोट्या आकारांपासून ते मोठ्या आकारांपर्यंत सगळ्यांनाच मागणी अहे. ड्रेसमध्ये फ्रंट नेकलाईन असो वा बॅक किंवा बॉटमलाइन सगळ्यांना आकर्षित करते. अनेकदा यात दोन्ही आकारांचं मिश्रणही केलं जातं. ड्रेस लाइनप्रमाणे स्कर्टच्या बॉटमलाईनमध्ये त्रिकोणी आकार दिसतो. कपड्याप्रमाणे इतर वस्तूंमध्येही भौमितिक आकारांचा समावेश झाला आहे. स्लिंग बॅगमध्येही हा आकार आला आहे. अगदी बुटांमध्येही त्रिकोण, चौकोनांचे आकार पाहायला मिळतात. ज्वेलरीमध्ये हे आकार दिसून येतात. त्रिकोणी आणि चौकोनी-आयताकृती असलेल्या नेकपीस, अंगठ्या, ब्रेसलेटस असे अनेक पर्याय फॅशनेबल दागिन्यांमध्ये दिसून येतायत. कपड्यांमध्ये तुमच्या शरीराच्या आकारानुसार नेकलाईन निवडली जाते.