​ मीच माझ्या डिझाइनची राणी गं!

महाराष्ट्रीय पारंपरिक कपड्यांना हटके लूक देऊन रॅम्पवर सादर करण्याचा प्रयोग अनेक नामवंत फॅशन डिझायनर्स करतायत. अशा पारंपरिक कपड्यांना इंडो-वेस्टर्न ढंगात सादर करण्यात श्रुती संचेती या डिझाइनरचा हातखंडा आहे. तिच्या या फॅशनेबल करिअरवर टाकलेला एक कटाक्ष...

मुंबई टाइम्स टीम
श्रुती संचेती मूळची नागपूरची असल्यामुळे महाराष्ट्रीय संस्कृतीला बघतच ती लहानाची मोठी झाली. आज जेव्हा डिझायनर म्हणून ती सगळीकडे जाते तेव्हा तिने वेगळ्या पद्धतीने केलेल्या महाराष्ट्रीय पारंपरिक कपड्यांच्या हटके डिझाइन्समुळे तिला ओळखलं जातं. लॅकमे फॅशन वीक, अॅमेझॉन फॅशन वीकसारख्या मोठ्या रॅम्पपासून श्रुतीला अनेक ठिकाणी काम करायला मिळालं. पैठणी, इरकली, नागपुरी चेक्स, नारायणी पेठ, खानदेशी कापड, गोंदिया प्रदेशात वापरले जाणारे चेक्सचे कापड यांना इंडो-वेस्टर्न लूक देण्यात श्रुतीचा हातखंडा आहे. त्यामध्ये तिने अनारकली, जॅकेट्स, खानदेशी कपड्यांचे ब्लाऊज, स्कर्ट, गाऊन्स या सगळ्यांना काठापदराचे बॉर्डर्स लावून डिझाइन केलं. या सगळ्या कपड्यांना तिने मराठमोळ्या दागिन्यांनी सजवलंय. 'महाराष्ट्रातही कापड उद्योग मोठ्या प्रमाणात होऊ शकतो. महाराष्ट्रातील कापड हे खूप वेगळं आणि अव्वल आहे. नवीन डिझाइन्स साकारताना नेहमीच महाराष्ट्रीय कपड्यांपासून केलेलं डिझाइनच भरपूर उत्साह देतं', असं श्रुती संचेती आवर्जून सांगते.