​ पॉम-पॉमला फ्युजनची जोड

नवरात्रीचं मुख्य आकर्षण असतं ती चनियाचोली! आजच्या फॅशनच्या दुनियेत चनियाचोलीचं काही नवीन प्रकार बाजारात आले आहेत. अशा विविध प्रकारांवर टाकलेली एक नजर...

पॉम-पॉम चनियाचोली
पॉम-पॉम हा या वर्षीचा नवीन ट्रेंड पाहायला मिळतोय. या चनियाचोलीमध्ये विणकामाचा जो धागा असतो त्याने सूती कापडावर काम केलं जातं. पॉम-पॉम आलं म्हणजे खूप रंगीबेरंगी आणि सुंदर वस्तू डोळ्यासमोर ओघाने येतातच. यावर्षीची नवरात्री पॉम-पॉम शिवाय पूर्ण होऊच शकत नाही. पॉम-पॉम लटकन्स, पॉम-पॉम चोली, दुप्पट्टा गरब्याच्या मैदानात गिरट्या घालताना नक्की दिसतील.

कलमकारी प्रिंट चनियाचोली
कलमकारी एक हस्तकलेचा प्रकार आहे. यामध्ये हाताने सूती कापडावर विविध नैसर्गिक रंगांचा वापर करून काम केलं जातं. घागऱ्यावर केलेलं काम एवढं परिपूर्ण असतं की त्यातून आपली भारतीय संस्कृतीची झलक पाहायला मिळते. दोन पदरी कलमकारी चनियाचोलीचा पर्याय सध्या हिट आहे.

मल्टी-ह्यूड चनियाचोली
काहींना भरगच्च भरतकाम केलेल्या चनियाचोली फारशा आवडत नाही. अशांसाठी मल्टी-ह्यूड चनियाचोलीमधले अनेक रंग पाहून डोळे भारावून जातात. सुती कापडावर असलेल्या अनेक रंगछटा सगळ्यांना आकर्षित करतात. ही चनियाचोली तुम्ही अगदी सहजरित्या सांभाळू शकता आणि यात तुम्ही उठून दिसाल.

गामथी चनियाचोली
पारंपारिक गामथी चनियाचोली ही या नवरात्रीमध्ये शोधण्यासारखी एक आहे. गामथी भरतकाम हे जाड धाग्यापासून केलं जातं. घागऱ्यावर केलेलं हे काम अगदी पारंपारिक आणि परिपूर्ण असतं. या गामथी घागऱ्यावर बॅकलेस चोली आणि रेश्मी दुपट्टा तुमच्या सौंदर्यात भर पाडतील आणि तुम्हाला एक आधुनिक लूकही मिळेल.

फ्युजन चनियाचोली
परिपूर्ण पाश्चात्य पेहराव असूनही आपल्या व्यक्तिमतवर पारंपरिक प्रभाव पडतो. जर तुम्हाला 'देसी अवतार' नको असेल तर तुमच्यासाठी फ्युजन चनियाचोली हा खूप छान पर्याय आहे. सौंदर्यपूर्ण प्रिंट्स आणि पॅटर्न्स तुमच्या मनाला आकर्षित करुन टाकतील.

संकलन- रसिका पाटील (डहाणूकर कॉलेज), प्रणाली सावंत (सेंट जॉन कॉलेज)