श्रावणक्वीनची स्पर्धक श्रियानं जिंकला ‘मिस टीन युनिव्हर्स इंडिया’चा किताब

दीपाली सकपाळ

‘मटा श्रावणक्वीन’ स्पर्धेनं शेकडो मराठी मुलींना सौंदर्यस्पर्धेत उतरण्याचा आत्मविश्वास मिळवून दिला. श्रावणक्वीनमधल्या अनुभवाच्या बळावर अनेक मराठी तरुणी ग्लॅमर इंडस्ट्रीत झळकू लागल्या आहेत. 'मिस टीन युनिव्हर्स इंडिया' हा किताब पटकावणारी श्रिया तोरणे हे यातलंच एक उदाहरण…

ग्लॅमर इंडस्ट्रीत प्रतिष्ठेच्या मानल्या जाणाऱ्या ‘मटा श्रावणक्वीन’ या स्पर्धेनं अनेक तरुणींना हक्काचं व्यासपीठ मिळवून दिलं. सुरुवातीलाच चांगलं व्यासपीठ मिळालं तर यशाच्या दिशेनं वाटचाल सुरू होते. याचाच पुन्हा एकदा प्रत्यय आला श्रिया तोरणे या तरुणीच्या निमित्तानं. गेल्या वर्षीच्या ‘मटा श्रावणक्वीन’ स्पर्धेमध्ये श्रियानं अंतिम फेरी गाठली होती. आता दिल्लीत नुकत्याच पार पडलेल्या ‘अब्राझस गॉडेस ऑफ ब्युटी’ या सौंदर्यस्पर्धेत श्रियानं 'मिस टीन युनिव्हर्स इंडिया'चा किताब पटकावला आहे. पुढील वर्षी अमेरिकेत होणाऱ्या 'मिस टीन युनिव्हर्स' या आंतरराष्ट्रीय सौंदर्य स्पर्धेत भारताचं प्रतिनिधीत्व करण्याची संधी तिला मिळणार आहे. यंदा ही स्पर्धा 'द उमराव' हॉटेलमध्ये पार पडली.

श्रिया मूळची नाशिकची असून नाशिकमध्ये झालेल्या 'मटा श्रावणक्वीन' एलिमिशन्स राऊंडमध्ये तिनं भाग घेतला होता. यात आपल्या गुणवत्तेची चुणूक दाखवत तिनं 'मटा श्रावणक्वीन' स्पर्धेच्या अंतिम दहा स्पर्धकांमध्ये धडक मारली होती. तिला या स्पर्धेमध्ये 'बेस्ट रॅम्पवॉक' आणि 'बेस्ट ब्युटीफुल आईज' या टायटल्सनी गौरवण्यात आलं होतं. 'मिस टीन युनिव्हर्स इंडिया' या स्पर्धेमध्येही 'मिस ब्युटीफुल आईज' या टायटलची ती मानकरी ठरली आहे.

‘मटा श्रावणक्वीन’ हे मला मिळालेलं सगळ्यात पहिलं व्यासपीठ. श्रावणक्वीनचा तो प्रवास माझ्यासाठी नक्कीच खूप खास होता. त्या स्पर्धेत विजेती ठरले नसले तरी ग्रूमिंग सेशनमध्ये झालेला व्यक्तिमत्त्व विकास प्रशिक्षणाचा मला खूपच फायदा झाला. आव्हानांना सामोरं जाण्याचा आत्मविश्वास मला या स्पर्धेतून मिळाला. त्यामुळे 'महाराष्ट्र टाइम्स'ची मी खूप आभारी आहे.
श्रिया तोरणे