टॅटू काढताय? अशी घ्या काळजी!

शब्दुली कुलकर्णी । कॉलेज क्लब रिपोर्टर

टॅटूजच्या प्रेमात असलेली तरुणाई त्याला आणखी कूल लूक येण्यासाठी त्या डिझाइनला साजेसे खडे किंवा रिंग टोचून घेऊ लागलीय. म्हणजेच टॅटूवर पिअर्सिंग केलं जाऊ लागलंय. पण पिअर्सिंगच्या वाढत्या प्रकारामुळे त्वचेला ‘इन्फेक्शन’ होण्याचं प्रमाण वाढताना दिसतंय. स्टाइल म्हणून अंगावर टॅटू काढून घेण्याचा ट्रेंड असला, तरी ही स्टाइल वेळप्रसंगी जीवावर बेतू शकते असा इशारा डॉक्टर्स देतायत.

'माय लव्ह', 'फॉरेव्हर लव्ह', 'लव्ह यू मा', 'डॅडीज लिटील एन्जल' असे किंवा अगदी सोशल मेसेज देणारे टॅटू सध्या तरुणाईमध्ये हिट आहेत. प्रेमात आकंठ बुडालेली तरुणाई तर त्याच्या किंवा तिच्या नावाचा टॅटू हमखास काढून घेते. केवळ तेवढंच नव्हे, तर सध्या निऑन रंगाचा टॅटू काढण्याचं फॅड जास्त आहे. या निऑन रंगामुळे, विशेषत: लाल रंगामुळे अॅलर्जी होते असं दिसून येतं. गळ्याभोवती, नाभी आणि मनगटावर टॅटू काढून त्यावर पिअर्सिंग केलं जातं, जे अतिशय धोकादायक असल्याचं सांगितलं जातं. गळा, नाभी आणि मनगटावरची त्वचा खूप नाजूक असते. त्यामुळे अशा त्वचेवर टॅटूवर पिअर्सिंग वरच्यावर केलं जातं. असे टॅटू किंवा पिअर्सिंग एखाद्या शिरेवर आल्यास ते जीवघेणं ठरु शकतं. त्याशिवाय ते पिअर्सिंग करुन लावलेली रिंग निघाल्यास गंभीर जखम होण्याचीही शक्यता असते.

>> अशी काळजी घ्या

चांगल्या दर्जाच्या टॅटू पार्लरमधून टॅटू काढून घ्या.

पार्लरमध्ये आरोग्याच्यादृष्टीनं योग्य ती काळजी घेतली जातेय का याची शहानिशा करा.

तुमचा टॅटू काढताना नवीन नीडल वापरण्यास सांगा.

पहिल्यांदा लहानसा ट्रायल टॅटू काढून घ्या.

तुम्हाला त्वचेची अॅलर्जी असल्यास टॅटू काढू नका.

>> स्टाइल पडेल महागात

टॅटू आणि त्याला शोभा येण्यासाठी पिअर्सिंग करण्याचं प्रमाण वाढलं आहे. तसंच निऑन रंगाचा टॅटू काढण्याकडे तरुणाईचा जास्त कल दिसून येतो. त्यातही लाल रंगाच्या छटेमधला टॅटू असला तर त्यामुळे अंगावर अॅलर्जी उठण्याचं प्रमाण जास्त आहे. त्याशिवाय हल्ली गळ्यावर, नाभीवर आणि मनगटाच्या नसेवर टॅटू काढून त्यावर पिअर्सिंग केलं जातं. जे वेळप्रसंगी जीवावरही बेतू शकतं.

-डॉ. रोहिणी तलवार, त्वचारोगतज्ज्ञ