खादीचं हे 'एसी' जॅकेट घाला, उन्हाची काहिली टाळा!

मटा ऑनलाइन वृत्त। बिहार

उन्हाळ्यात तुमचं संरक्षण करणारं खादीचं 'एसी' जॅकेट आलंय. 'सेल्फ कुलिंग' तंत्रज्ञान असलेल्या या लिनन जॅकेटच्या आत गरम आणि थंड हवेसाठी पंख्यांची जोडणी केलेली आहे. बॅटरीवर काम करणाऱ्या या जॅकेटमध्ये दोन बटणे असून लाल बटण गरम हवेसाठी तर हिरव्या रंगाचे बटण थंड हवेसाठी आहे. लवकरच हे 'एसी' जॅकेट उन्हाची काहिली दूर करण्यासाठी बाजारात दाखल होणार आहे.

एमएसएमई (सूक्ष्म, लघु व मध्यम उद्योग) विभागाचे केंद्रीय राज्यमंत्री गिरिराज सिंग यांनी बिहारमधील नवादा येथील आपल्या खानवा मतदारसंघात या 'एसी' जॅकेटचे मंगळवारी अनावरण केले. सियाचिनसारख्या प्रदेशात हे जॅकेट सैनिकांसाठी फायदेशीर ठरेल असे त्यांनी यावेळी सांगितले.

या जॅकेटची किंमत ऐकाल तर मात्र तुम्हाला नक्की घाम फुटेल. यात बिनबाह्यांच्या (स्लिव्हलेस) जॅकेटची किंमत १८ हजार रुपये तर पूर्ण बाही असलेल्या (फूल स्लीव्हज) जॅकेटची किंमत २५ हजार रुपये इतकी आहे. नॅशनल इन्स्टिट्युट ऑफ फॅशन टेक्नॉलॉजी (NIFT)या संस्थेतील विद्यार्थ्यांनी या जॅकटचे डिझाइन बनविण्यात मदत केली आहे.