लग्नाची खरेदी करताय?

दिवाळीची खरेदी झाल्यानंतर आता अनेकांची लग्नसराईसाठी शॉपिंग सुरू झाली असेल. खरं सांगायचं, तर लग्नाची खरेदी कधीच पूर्ण होत नसते. काहीतरी राहिलं म्हणून बाजारात पुन्हा चक्कर मारावीच लागते. मात्र, लग्न एकदाच होत असतं, हौसेला मोल नसतं, जास्त पैशानंच स्टायलिश गोष्टींची खरेदी करता येते या विचारानं पैसा वाचवायचाच नाही असं करू नका. शॉपिंग जर बार्गेनिंग करता-करता केली, तर त्याचा आनंद काही औरच असतो. याचसाठी काही गोष्टी मात्र ध्यानात ठेवाव्या लागतात, ज्यायोगे दिवाळीमध्ये भरघोस खर्च केल्यानंतर लग्नाची शॉपिंग खिशाला परवडेल.
लवकर सुरुवात करा
खरं तर गणशोत्सवानंतरच बाजारात विविध फॅशनेबल वस्तूंची रेलचेल सुरू होते. कारण विक्रेत्यांना नवरात्र, दिवाळी, लग्नसराई हे निमित्त कॅश करायचे असतात. त्यामुळे लग्नाच्या चार ते पाच महिने आधीपासूनच मार्केटवर वॉच ठेवा, ज्यायोगे वधू-वरासाठी असलेल्या पेहरावाच्या पर्यायांबद्दल समजेल. तसंच, फ्रेश कलेक्शनही तुमचं मन खुलवेल. तसंच, खरेदीला बाहेर पडताना सकाळी १० वाजताच पडा. म्हणजे बोहनीच्या वेळेला खिशाला परवडणारी आणि त्यामुळे आनंददायी ठरणारी शॉपिंग पथ्यावर पडेल. त्याचप्रमाणे सकाळच्या वेळेस विक्रेते किंवा सेल्समन उत्साही असल्यानं जास्तीत जास्त व्हरायटी ते स्वतःहून दाखवतात आणि स्वतःहून सुचवतातही.
आधी यादी करा
आपल्याला नेमकं काय खरेदी करायचं आहे याची सुरुवातीला यादी करा आणि मगच खरेदीसाठी बाहेर पडा. यामुळे अवास्तव खर्च होणार नाही. कधीकधी बाहेर गेल्यानंतर दिसलेल्या चांगल्या वस्तू खरेदी करण्याचा मोह होतोच होतो आणि पैसे जास्त खर्च होतात. तेच जर तुमच्यापाशी यादी असेल, तर त्याबाहेर खरेदी करण्याची इच्छा होणार नाही. यामुळे बजेटही वाढत नाही. यादी हातात असल्यानं आपण थेट त्याच वस्तू्च्या दुकानात जातो, आजूबाजूला काय आहे हे पाहायलाही होत नाही.
व्होलसेल मार्केटमध्ये जा
रिटेल मार्केटपेक्षा व्होलसेल मार्केटमध्ये खरेदी करा. यामुळे बरेच पैसे वाचतात. एकाच दर्ज्याच्या वस्तूला उगाचच जास्त पैसे मोजण्यापेक्षा त्या व्होलसेल मार्केटमधूनच घ्या. एकतर इथं एकापेक्षा जास्त नग खरेदी केले, तर परडवतं आणि दुकानदारही स्वतःहून पैसे कमी करण्याची शक्यता असते.
छोटी दुकानं निवडा
मोठ्या दुकानांत खरेदी करण्यापेक्षा छोट्या दुकानांना पसंती द्या. इथं भाव कमी होण्याची शक्यता असते. तसंच, त्या दुकानाच्या देखभालीचा खर्च तुमच्या खरेदीच्या बिलात उगाचच लागत नाही. अनेकदा एखादं दुकान हॅपनिंग ठिकाणी असल्यानं किंवा ते खरेदीचं हक्काचं ठिकाण असल्यानं किमती जास्त असण्याची शक्यता असते. याचा फटका खरेदीदारालाच बसतो. हे टाळण्यासाठी छो़ट्या दुकानात जा. तो विक्रेताही नवीन फॅशन दुकानात ठेवतोच की; कारण त्यालाही व्यवसाय करायचा असतो. शहराबाहेरील दुकानं निवडा.