सूज, पोटदुखी, वजन वाढणे, केस गळणे, अंगदुखी, थकवा, अशक्तपणा या लक्षणांकडे अनेक महिला नेहमी दुर्लक्ष करतात असे अनेकदा दिसून येते. खरं तर, हे संकेत असे आहेत ज्यावर वेळेवर उपचार करणे आवश्यक आहे. ही अशी लक्षणे आहेत जी काही सामान्य आरोग्य समस्यांची लक्षणे असू शकतात आणि त्याकडे दुर्लक्ष केले जाऊ नये. 28 मे रोजी आंतरराष्ट्रीय महिला आरोग्य दिन (international women's health day 2022) साजरा केला जाणार आहे. या प्रसंगी जयपुर स्थित गौतम इंस्टिट्यूट ऑफ बिहेवियरल सायन्ससेजचे डायरेक्टर प्रोफेसर डॉक्टर शिव गौतम अशा काही लक्षणांबद्दल माहिती देत आहेत, जी तुम्हाला जाणवल्यास तत्काळ डॉक्टरांकडे जावे.
विनाकारण वजन वाढणे किंवा कमी होणे
वजन वाढणं आणि वजन कमी होणं ही दोन्ही धोक्याची चिन्हे आहेत. वजन वाढणे हे केवळ खाण्याच्या चुकीच्या सवयी किंवा अनहेल्दी जीवनशैलीचा परिणाम नाही तर हे हायपरथायरॉईडीझम किंवा हायपोथायरॉईडीझम किंवा अगदी PCOS मुळेही असू शकते. आपण हे लक्षण गांभीर्याने घेतले पाहिजे.
सतत थकवा जाणवणे
ही सर्वात सामान्य आरोग्य समस्यांपैकी एक आहे ज्याकडे स्त्रिया सर्रास दुर्लक्ष करतात. अर्थात, घर आणि ऑफिसच्या कामांमुळे तुम्हाला थकवा येतो पण जर आठ तासांची शांत झोप घेतल्यानंतरही थकवा जाणवत असेल तर लगेच आरोग्याची तपासणी करून घ्यायला हवी. सतत थकवा हे हृदय, किडनी, लिव्हर आणि रक्ताशी संबंधित समस्यांचे लक्षण असू शकते.
श्वास घेण्यास त्रास, चक्कर येणे व डोकेदुखी
सतत कामाच्या ताणतणावामुळे ही लक्षणे जाणवणे सामान्य आहे, परंतु जर तुम्हाला या समस्यांनी वारंवार त्रास होत असेल तर ते हृदयाच्या अंतर्निहित समस्या किंवा व्हिटॅमिन्स आणि आयर्नच्या कमतरतेचे एक चिंताजनक लक्षण असू शकते. यामुळे तुम्हाला हृदयविकाराच्या झटक्यासह हार्ट स्ट्रोकचा धोका देखील वाढू शकतो.
केसगळती
एका दिवसात सुमारे 50-100 केस गळणे सामान्य मानले जात असले तरीही असं होऊ नये. जर तुमचे रोज यापेक्षा जास्त केस गळत असतील तर त्याकडे दुर्लक्ष करू नका. केस गळणे हे सहसा ऑटोइम्यून डिजीज व थायरॉईड इत्यादी अंतर्गत रोगांचे लक्षण असते.
सतत पोट फुगणे
पोट फुगणे ही सर्वात सामान्य आरोग्य समस्यांपैकी एक आहे. मासिक पाळीच्या दरम्यान किंवा त्याआधी पोट फुगल्यासारखे वाटणे अगदी सामान्य आहे, परंतु जेव्हा दोन आठवड्यांपेक्षा जास्त काळ पोट फुगल्याचा अनुभव येतो तेव्हा ते सामान्य नसते. फुगलेले पोट हे एंडोमेट्रिओसिसच्या प्रमुख लक्षणांपैकी एक आहे, विशेषतः जर ते अनियमित आणि वेदनादायक मासिक रक्तस्त्राव, संभोगा दरम्यान वेदना इत्यादीशी संबंधित आहे.
टीप : हा लेख फक्त सामान्य माहितीसाठी आहे. हे कोणत्याही प्रकारे कोणत्याही औषधाचा किंवा उपचारांचा पर्याय असू शकत नाही. अधिक तपशीलांसाठी नेहमी आपल्या डॉक्टरांशी संपर्क साधावा.