मिळालेल्या मोकळ्या वेळेचा कसा जास्तीत जास्त उपयोग करून घेता येईल याकडे अनेकांचा कल आहे. एरवी रोजच्या धावपळीत टॅटू काढण्याचं राहून गेलेली मंडळी स्टुडिओंच्या दिशेनं मोर्चा वळवत आहेत. तुम्हीसुद्धा सध्या टॅटू काढून घेण्याचा विचार करताय? मग त्याआधी तुम्हाला स्टुडिओंनी आखून दिलेल्या नियमांविषयी जाणून घ्यायला हवं. या नियमांचं काटेकोरपणे पालन करणं गरजेचं आहे.
टॅटू आर्टिस्टची आगाऊ वेळ घेऊन सुरक्षित वावराच्या बंधनाचं पालन करणं आवश्यक राहील. मुंबईतील काही टॅटू स्टुडिओजनी करोनाच्या पार्श्वभूमीवर सुरक्षेच्या दृष्टीनं खास नियमावली जाहीर केली आहे. प्रत्येकाला त्या नियमांचं पालन करावं लागणार आहे. ग्राहक आणि टॅटू आर्टिस्ट या दोघांच्या सुरक्षेच्या दृष्टीनं ही नियमावली बनवण्यात आली आहे.
ग्राहकांसाठी सूचना
फोनवरून किंवा सोशल मीडियाच्या माध्यमातून आगाऊ वेळ घेणं बंधनकारक आहे. थेट स्टुडिओमध्ये आलेल्या ग्राहकाला सेवा पुरवली जाणार नाही. ग्राहकांना आपल्यासह कुटुंबातील इतर सदस्य किंवा मित्र-मैत्रिणींना घेऊन जाता येणार नाही. एका वेळी एकच ग्राहकाला स्टुडिओमध्ये प्रवेश मिळेल. त्यानुसार वेळेचं नियोजन केलं जात आहे. ग्राहकांनी मास्क घालणं बंधनकारक आहे. तसंच आवश्यकता असल्यास ग्राहक फेस शिल्ड किंवा ग्लोव्हजचा वापर करू शकतात.
(Covid 19 या ५ आयुर्वेदिक उपचारांमुळे करोनापासून होऊ शकतो बचाव, डॉक्टरांचा दावा)
घरून पाणी व खाद्यपदार्थ आणा
स्टुडिओमध्ये प्रवेश केल्यावर प्रत्येक ग्राहकाच्या शरीराचं तापमान तपासलं जाईल. शिवाय हात आणि शरीरावर सॅनिटायझरची फवारणी केली जाईल. पाण्याची बाटली आणि आवश्यक असल्यास खाऊ ग्राहकांनी स्वत: घरून आणावा. कित्येक ग्राहक स्टुडिओमध्ये ऑनलाइन सेवेच्या माध्यमातून खाद्यपदार्थांची ऑर्डर देतात. यापुढे असं करता येणार नाही. स्टुडिओमध्ये आल्यावर ग्राहकांचा इतर गोष्टींचा कमीत कमी ठिकाणी स्पर्श होईल, याची काळजी घेतली जाईल. याबाबत ग्राहकांनी देखील सतर्क राहावं, अशी विनंती स्टुडिओजद्वारे केली जात आहे.
(करोनाच्या प्रादुर्भावात नेत्रदोष असलेल्या वृद्धांची काळजी घ्या, अन्यथा…)
अनावश्यक वस्तूंना नो एंट्री
रोख रक्कमेपेक्षा ऑनलाइन पेमेंटना प्राधान्य दिलं जाईल, जेणेकरुन कमीत कमी संपर्क होईल. काम झाल्यानंतर स्टुडिओमध्ये उगाच रेंगाळत बसू नये, अशी विनंती केली जात आहे. अनावश्यक वस्तू म्हणजेच गॉगल, पुस्तक किंवा मोठमोठ्या पिशव्या आणता येणार नाही.
(Covid 19 Pandemic पावसाळ्यात भाज्याफळे विकत घेताना करू नका 'या' चुका)
आर्टिस्ट कशी खबरदारी घेणार?
प्रत्येक वेळी नीडल बदलणं हा नियम आधीपासूनच असून सद्यस्थितीतही तो कटाक्षानं पाळला जात आहे. आर्टिस्ट फेस शिल्ड, मास्क आणि दंडापर्यंत ग्लोव्हज घालून असतील. शिवाय आधी आणि नंतर सर्व साहित्य सॅनिटाइज केलं जात आहे. नीडलिंग मशीनलाही सुरक्षा कवच लावून त्याचा वापर केला जातोय. प्रत्येक नवीन ग्राहकाच्या वेळी मशीनवरील सुरक्षा कवच बदललं जाणार आणि ते सॅनिटाइज केलं जाणार.
(करोनाच्या प्रादुर्भावात नेत्रदोष असलेल्या वृद्धांची काळजी घ्या, अन्यथा…)
मिनिमलिस्ट टॅटूला प्राधान्य
सध्या करोनाच्या पार्श्वभूमीवर मिनिमलिस्ट म्हणजेच छोट्यातलं छोटं टॅटू काढून घेण्यास प्राधान्य दिलं जात आहे. या प्रकारचं टॅटू कमीत कमी वेळेत काढून होतं. आर्टिस्ट आणि ग्राहक कमीत कमी संपर्कात येतात, हा त्यामागचा विचार आहे.
(नव्या विषाणूंच्या साथी का येतात? अमेरिकेतील सीडीसीनं रिपोर्टद्वारे सांगितली १० कारणे)
सुरक्षिततेचा विचार
सगळ्याच क्षेत्रांसाठी सध्याचा काळ आव्हानात्मक आहे. त्यामुळे ग्राहक आणि आर्टिस्टच्या सुरक्षेचा विचार प्रामुख्यानं करणं गरजेचं आहे. शक्य तेवढी काळजी घेऊन सेवा देण्याचा प्रयत्न आम्ही करत आहोत. ग्राहकांच्या सुरक्षेच्या दृष्टीनं काही नियम बनवण्यात आले आहेत. त्याचं पालन करुन ग्राहकांनी सहकार्य करणं अपेक्षित आहे. - समीर पतंगे, सेलिब्रिटी टॅटू आर्टिस्ट