व्यायाम जरा जपूनच!

आजकालच्या काळात फिटनेसच महत्त्व प्रत्येकाला पटू लागलंय. त्यामुळे जिमला जाऊन व्यायाम करण्याऱ्या लोकांची संख्या मोठी आहे. पण जिमला जाता म्हणजे लढाई संपत नाही. व्यायाम करताना उत्साहाच्या भरात आपल्याकडून अनेक चुका होतात. जर तुम्ही आयुष्याच पहिल्यांदाच जिमला जात असाल तर खालील चुका टाळा

प्रमाणाबाहेर व्यायाम टाळा

प्रथमच जिममध्ये जात असलेल्यांमध्ये एक वेगळाच उत्साह असतो. तसंच जिममधील सहकारी पाहून जास्तीचा व्यायाम करण्याच्या मोह प्रत्येकाला होतोच. पण प्रमाणाबाहेर व्यायाम केल्यास शारीरिक दुखापत होऊ शकते. त्यामुळे अतिउत्साहाला आवरा.

पोटाखालील शरीराकडे लक्ष द्या

जिममध्ये गेल्यावर बऱ्याचदा शरीराच्या वरच्या भागाकडे अधिक लक्ष दिलं जातं. आठवड्यातून दोनदा तरी मांड्या, पाय यांचे व्यायाम करा.

सर्व स्नायूंना न्याय द्या

एकाच स्नायूंच्या व्यायामामुळे शरीराचं संतुलन बिघडून ईजा होऊ शकते. म्हणूनच व्यायाम करताना प्रत्येक स्नायूंना योग्य न्याय द्या.

फरक जाणा

बऱ्याचदा स्ट्रेचिंग हे वेट लिफ्टिंगच्या आधी केलं जातं. पण हे चुकीचं असून व्यायाम पूर्ण झाल्यावर शरीराचं स्ट्रेचिंग करा. वॉर्म अप मात्र व्यायाम सुरू करण्याच्या आधी करायचं, हे पक्क ध्यानात ठेवा.

आधी कार्डीओ नको

वेट लिफ्टिंगसाठी भरपूर शक्तीची गरज असते. अशावेळी वेट लिफ्टिंगआधी कार्डीओ केल्यास शक्ती खर्च होऊन अनावश्यक थकवा येऊ शकतो.

संकलन- दीपाली सकपाळ, कॉलेज क्लब रिपोर्टर