निकालाला सामोरं जाताना...

परीक्षांचा निकाल म्हटलं, की प्रत्येक विद्यार्थ्याला धाकधूक असते. या तणावाचा आरोग्यावर विपरित परिणाम होण्याची शक्यता असते. तुमच्या मनातली निकालाची भीती पळवून लावण्यासाठी या काही टिप्स...

दीर्घ श्वास घ्या

डोळे मिटून संपूर्ण लक्ष श्वासावर केंद्रित करा. शरीर आणि मन शांत करा. दररोज पाच ते दहा मिनिटं वेळ काढून मेडिटेशन केल्यास फायदा होतो.

मस्त खा आणि झक्कास राहा

नाराज झाला, तरीही वेळच्यावेळी खायला हवंच. उपाशी राहून काहीच बदलणार नाही. किंबहुना बिघडण्याचीच शक्यता जास्त आहे. मधल्या वेळेत दूध, ताजी फळं, उपमा, पोहे, खाकरा, सँडविच यांसारखे पौष्टिक पदार्थ खाण्याला प्राधान्य द्या. स्वयंपाकाला नाविन्याची जोड द्या.

भरपूर पाणी प्या

दररोज किमान आठ ते दहा ग्लास पाणी पिणं अत्यंत आवश्यक आहे. यामुळे मेंदूची कार्यक्षमता वाढते आणि शरीरातील अंतर्गत क्रिया व्यवस्थित पार पडतात.

फिटनेसला पर्याय नाही

दिवसातली तीस मिनिटं व्यायामासाठी राखून ठेवा. व्यायामामुळे ताण हलका होतो आणि उत्साह संचारतो.

टेन्शनला पळवून लावा

जास्त ताण जाणवायला लागला, तर आवडीचं काही तरी करण्यात स्वतःला गुंतवून ठेवा. उदा. गाणी ऐकणं किंवा भटकंती.

शांत झोप गरजेची

रोज किमान सहा ते आठ तासाची शांत झोप घेणं गरजेचं आहे. झोपण्याआधी दहा मिनिटं पायाचे तळवे गरम पाण्यात बुडवल्यानं झोप चांगली लागते.

सकारात्मक दृष्टिकोन ठेवा

नख खाणं, उगाचच विचार करत बसणं, नुसतीच पानं उलटत पुस्तकाकडे बघत बसणं अशा सवयींपासून लांब राहा. यामुळे वेळ तर फुकट जातोच, शिवाय अवघड प्रश्नांना आमंत्रण मिळतं. स्वतःचं आयुष्य सोपं करणं हे आपल्या हातात असतं आणि विचारांमध्ये सुसूत्रता आणून आपण ते करूच शकतो.

मेंदूला हवं खाद्य

सुकामेवा हा प्रथिनं आणि जीवनसत्त्वांचा उत्तम स्रोत आहे. काजू, बदाम, मनुका, अक्रोड, अंजीर खाल्ल्यानं शरीराला आवश्यक पोषणतत्त्व मिळतात. फक्त प्रमाणावर लक्ष असू द्या, कारण वजन वाढण्याची शक्यता असते.

नमिता जैन (फिटनेस, वेट मॅनेजमेंट अँड लाइफस्टाइल तज्ज्ञ)