या 86 वर्षीय व्यक्तीच्या रक्त तपासणीमध्ये व्हिटॅमिन बी 6 ची कमतरता होती असे सांगण्यात येत आहे. डॉक्टरांनी त्याला ही कमी भरून काढण्यासाठी 50 मिलीग्रॅम व्हिटॅमिन बी 6 सप्लिमेंट घेण्याचा सल्ला दिला. त्यामुळे त्याच्या पायात तीव्र वेदना होऊ लागल्या. जेव्हा त्याला चालता येईना तेव्हा त्याला हॉस्पिटलमध्ये दाखल केले आणि नंतर समजले की व्हिटॅमिन बी 6 मुळे शरीरात विषबाधा झाली आहे. चला जाणून घेऊया व्हिटॅमिन बी 6 शरीरासाठी किती महत्त्वाचे आहे, अधिक घेण्याचे काय तोटे आहेत आणि कोणत्या गोष्टींमध्ये ते आढळते.
रोज किती व्हिटॅमिन बी6 ची गरज असते?
50 वर्षे आणि त्यापेक्षा कमी वयाच्या लोकांसाठी व्हिटॅमिन बी 6 चे दैनिक सेवन 1.3 मिलीग्रॅम आहे. वयाच्या 50 शी नंतर, व्हिटॅमिन बी 6 चे दैनिक सेवन महिलांसाठी 1.5 मिलीग्रॅम आणि पुरुषांसाठी 1.7 मिलीग्रॅम आहे.
व्हिटॅमिन बी 6 मुळे झालेल्या विषबाधेची लक्षणे
व्हिटॅमिन बी 6 मुळे होणारी विषबाधा सहसा दुर्मिळ असते कारण जास्तीचे ‘बी’ व्हिटॅमिन्स बहुतांश वेळा लघवीद्वारे शरीराबाहेर पडतात. पण जास्त प्रमाणात व्हिटॅमिन घेतल्यास विशेषतः दीर्घकाळापर्यंत घेतल्यास शरीरातील विषारीपणा वाढू शकतो. 200 मिलीग्रॅमपेक्षा जास्त व्हिटॅमिन बी 6 सप्लिमेंट्समुळे मज्जातंतूचे विकार होऊ शकतात, ज्यामध्ये मज्जातंतूंच्या नुकसानामुळे पाय निकामी होऊ शकतात.
व्हिटॅमिन बी 6 का गरजेचे आहे?
व्हिटॅमिन बी 6 हे पाण्यात विरघळणारे व्हिटॅमिन आहे जे शरीराला अनेक कार्यांसाठी आवश्यक असते. प्रोटिन, फॅट आणि कार्बोहायड्रेट चयापचय, लाल रक्तपेशी आणि न्यूरोट्रांसमीटर तयार करण्यासाठी हे आवश्यक आहे. शरीर स्वतःहून व्हिटॅमिन बी 6 तयार करू शकत नाही, म्हणून आपण ते अन्न किंवा सप्लिमेंट्समधून घेतले पाहिजे. बहुतेक लोकांना त्यांच्या आहारातून पुरेसे व्हिटॅमिन बी 6 मिळते आणि त्यांना कोणत्याही सप्लिमेंट्सची आवश्यकता नसते.
कोणत्या पदार्थांत असते व्हिटॅमिन बी 6
- मांस
- चिकन
- मासे
- चणे
- शेंगदाणे
- सोयाबीन
- गव्हाचे बी
- जव
- केळी
- दूध
व्हिटॅमिन बी 6 ची कमी कोणाला होऊ शकते?
ज्या लोकांना किडनीचा आजार आहे किंवा दुसरी एखादी अशी समस्या आहे जी त्यांच्या लहान आतड्याला पोषक द्रव्ये शोषून घेण्यापासून रोखते आहे त्यांना व्हिटॅमिन बी 6 ची कमतरता असण्याची शक्यता जास्त असते. ऑटोइम्यून रोग, मिर्गी या मेंदूच्या आजाराची औषधे आणि अल्कोहोल देखील एखाद्या व्यक्तीच्या शरीरात व्हिटॅमिन बी 6 ची कमतरता निर्माण करू शकतात.
टीप : हा लेख फक्त सामान्य माहितीसाठी आहे. हे कोणत्याही प्रकारे कोणत्याही औषधाचा किंवा उपचारांचा पर्याय असू शकत नाही. अधिक तपशीलांसाठी नेहमी आपल्या डॉक्टरांशी संपर्क साधावा.