उपयुक्त भुजंगासन

भुजंगाबद्दल तुम्ही नक्कीच ऐकलं असेल. भुजंग जसा फणा काढून ताठ होतो, तशी शरीराची स्थिती दिसणारं भुजंगासन हे आसन सर्वांसाठी उपयुक्त आहे. भुजंगासन केल्यामुळे पाठीच्या कण्याला बळ मिळतं. तो लवचीक होतो आणि स्नायूंना मजबुती मिळते. कंबरेचं दुखणं, स्लिप डिस्क, सायटिका, सर्व्हायकल स्पाँडिलायटिस या पाठीच्या कण्याशी संबंधित दुखण्यांमध्ये हे आसन करणं फायदेशीर ठरु शकतं. ओस्टिओपोरोसिसमध्येही याचा उपयोग होतो. या आसनामुळे किडनी, यकृत, स्वादुपिंड आणि आतड्यांना बळ मिळतं. महिलांशी संबंधित आजार, बद्धकोष्ठता, अपचन, भूक न लागणं हे पोटाचे आजार दूर ठेवण्याच्या दृष्टिनं हे आसन उपयोगी आहे. मूत्र विकारांमध्ये याचा लाभ होतो. फुफ्फुसांना बळ आणि खांद्यांना बळकटी देतं. या आसनामुळे मज्जासंस्था चांगल्या प्रकारे काम करते आणि सक्रिय राहते.

काय काळजी घ्याल? आसनाच्या स्थितीमध्ये येताना किंवा त्या स्थितीतून बाहेर पडताना कोणत्याही प्रकारे घाई करू नये. अत्यंत शांतपणे, हळूवारपणे हे आसन करावं. हर्निया आणि पोटावर घाव असतील तर हे आसन करू नये.

कसं कराल? पोटावर झोपा. डोकं जमिनीवर ठेवा. हाताचे तळवे खांद्यांच्या खाली जमिनीला टेकून ठेवा. हाताचे कोपर शरीराला लागून असतील. दोन्ही पाय एकमेकांना चिकटलेले असतील, पायाच्या टाचा एकमेकांना लागून राहतील. श्वास घेता घेता हळूहळू डोकं वर उचला. मान शक्य तेवढी मागच्या बाजूला वाकवून खांदे आणि छाती वरच्या दिशेनं उचला. हळूहळू कंबर वाकवा. शरीराचा बेंबीपर्यंतचा पुढचा भाग वर उचला आणि मान मागच्या बाजूला वाकवा. या स्थितीत पाय एकमेकांना चिकटलेलेच राहतील. श्वासोच्छ्वास सामान्य ठेवून या आसनात शक्य तितका वेळ थांबा. नंतर हळूहळू श्वास सोडून हळुवारपणे पुन्हा पूर्वस्थितीला या. तळवे डोक्याखाली जमिनीवर टेकवून थोडा वेळ आराम करा. किमान दोन वेळा हे करा.