योगासनं लाइव्ह

रोजच्या गडबडीत मन आण‌ि शरीर दोन्हीची शांतता म‌ि‍ळवायची तर योगासनांना पर्याय नाही. पण त्याच्या क्लासना जाणं, त्यासाठी वेळ देणं आपल्याला जमेलच असं नाही. आता हे सगळं ऑनलाइन करता येईल.

अजय उभारे, कॉलेज क्लब रिपोर्टर

हल्लीच्या धावपळीच्या जगात लोकांना स्वतःकडे आणि स्वतःच्या आरोग्याकडे लक्ष देण्याइतका वेळ नसतो. घड्याळाच्या काट्याप्रमाणे सतत धावते जीवन जगणाऱ्या शरीराने आराम या शब्दालाही ‘राम-राम’ ठोकला आहे. शरीर निरोगी राखायचं असेल तर योग्य आहार, शुद्ध हवा आणि पाण्यासोबतच व्यायाम आणि योगासनांचीही गरज असते. पोषक आहारापेक्षा फास्ट फूडचा अधिक वापर आणि मैदानी खेळांपेक्षा खुर्चीत बसून ऑनलाईन होणाऱ्या जय-विजयावर समाधान मानतो.

आयुष्य सुलभ करण्यासाठी टेक्नॉलॉजीच्या या युगाने माणसाचे आयुष्य अगदी सोप्पं केलं आहे. पायऱ्या चढायचा त्रास नको म्हणून लिफ्ट आल्या तर बाजारात जाण्याचा कंटाळा म्हणून खरेदीचा ऑनलाईन फंडा आला. मात्र या सगळ्याचा कळत-नकळतपणे आपल्या शरीरावरच उलट परिणाम झाला. त्यामुळे शरीर आणि मनाला होणारे भविष्यातील अपाय टाळण्यासाठी दिवसातील काही मिनिटं स्वतःसाठी काढण्याची वेळ आली आहे हे नक्की. मात्र यासाठी तुम्हाला कोणत्याही मोठ्या व्यायाम शाळेत किंवा योगा क्लासेलला जाण्याची अजिबात गरज नाही. कारण यातही तुमचा स्मार्टफोन आणि इंटरनेट हे जीवलग तुमची मदत करणार आहेत. देशातील आणि प्रत्येक शहरातील योगाप्रेमींसाठी तर ही एक आनंदाची पर्वणीच असणार आहे. कारण हे योगाचे क्लासेस तुमच्या मोबाइलवर उपलब्ध होतील. ‘शम्मी योगालय फाउंडेशन’च्या वतीने १९ ते २१ जून या कालावधीत ‘मुंबई योगा फेस्टिवल’चे आयोजन करण्यात आले आहे. त्या कार्यक्रमांतर्गत आठवड्यातून तीन वेळा प्रत्येकी दहा मिनिटांचे व्हिडीओ 'पेरिस्कोप' या अॅपच्या माध्यमातून तुम्हाला पाहायला मिळतील. तुमच्या आरोग्याच्या दृष्टीने लाभदायक ठरतील यात शंकाच नाही. पुढील काही दिवसात मधुमेहावर मात करण्यासाठी ही काही योगासने तुम्हाला यातून पाहता आणि करता येतील. धावपळीचे जीवन जगणाऱ्या मुंबईकरांसाठी आता काम किंवा प्रवास करताना योगा शिकणंही सोयीचं झालं आहे.