पाशासन

जमिनीवरील आसनावर ताठ, पावलं एकमेकांना चिकटलेली, हात मांडीजवळ असं ताडासनामध्ये उभं राहावं. श्वास सोडत गुडघ्यांमध्ये पाय दुमडत सावकाशपणे टाचांवर बसावं. नितंब टाचांना टेकलेले हवे. श्वास घ्यावा आणि सोडत संपूर्ण शरीर उजव्या बाजूला वळवावं. उजवा खांदा वर राहील, अशा पद्धतीनं उजवा हात पाठीमागे न्यावा. डावा हात गुडघ्यांना विळखा घालत पाठीमागे न्यावा. उजव्या हाताचं मनगट डाव्या हातानं पकडावं. यामुळे दोन्ही हातांचा विळखा किंवा पाश दिसेल. म्हणूनच याला पाशासन असं म्हटलं जातं. पावलं एकमेकांना चिकटलेली हवीत. पोटाचे स्नायू घट्ट न करता शिथिल ठेवावे. हे आसन साधारण एक ते दीड मिनिटांपर्यंत स्थिर करावं. पूर्व स्थितीत येऊन दुसऱ्या बाजूनं पुन्हा करावं.
शारीरिक फायदे ः खांदे, गुडघे, घोटे, पाठीचा कणा, पोटाचे व छातीचे स्नायू यांचा परिपूर्ण व्यायाम होऊन ते मजबूत होतात.
वैद्यकीय फायदे ः अस्थमा, सायटिका, बद्धकोष्ठ, पाठीचं दुखणं यांवर लाभकारी आसन. मासिक पाळीचे त्रास कमी होतात.
मानसिक फायदे ः मन एकाग्र होतं. संपूर्ण शरीराला पीळ बसल्यामुळे ते ताजंतवानं होतं. मनावरील ताण, मरगळ, आळस दूर होतो.
कोणी करू नये ः तीव्र घोटेदुखी, गुडघेदुखी, पाठदुखी, खांदेदुखी असणाऱ्यांनी करू नये किंवा योगतज्ज्ञांच्या साहाय्यानं करावं.