खांद्यांना बळकटी देणारं सर्पासन

सर्पासन हे नाव वाचून थोडंसं आश्चर्य वाटलं असेल ना? पण हो, या आसनाचं नाव तसंच आहे. कंबर आणि मानेच्या स्नायूंना लवचीकता देणारं आणि मजबूत करणारं हे आसन आहे. कंबरेचं दुखणं, सायटिकाचं दुखणं, सर्व्हायकल स्पाँडलायटिस या दुखण्यांमध्ये हे आसन लाभदायी ठरतं. किडनी, यकृत, स्वादुपिंड आणि आतड्यांना हे आसन बळ देतं. महिलांच्या विकारांमध्ये ते उपयुक्त आहे. बद्धकोष्ठता, अपचन, भूक न लागणं असे पोटांचे विकार या आसनामुळे बरे होऊ शकतात. फुफ्फुसं मजबूत करणारं, खांद्यांना बळकटी देणारं तसंच मज्जातंतूंचं कार्य सुरळीत ठेवणारं हे आसन आहे.

काय काळजी घ्याल? हर्निया आणि पोटावर घाव असतील तर मात्र हे आसन करू नये.

कसं कराल? पोटावर झोपा. डोकं जमिनीवर टेकवा. आता हात कंबरेच्या मागे न्या आणि दोन्ही हाताची बोटं एकमेकांमध्ये गुंतवा. पायाचे तळवे आणि टाचा एकमेकांना जोडलेली राहतील. श्वास घेत हात मागच्या बाजूला खेचा. डोकं वरच्या बाजूला उचला. मान मागे वळवत खांदे आणि छातीचा भागही उचलायचा प्रयत्न करा. कंबर मागच्या बाजूला वाकवून शरीराचा पुढचा, बेंबीपर्यंतचा भाग वर उचला. श्वासोच्छ्वास सामान्य ठेवून जितका वेळ शक्य आहे तेवढा वेळ आसनाच्या स्थितीमध्ये थांबा. नंतर श्वास सोडत हळूहळू पुन्हा पूर्वस्थितीत परत या. किमान दोन वेळा तरी हे आसन करा.

डॉ. सुरक्षित गोस्वामी, योगगुरू