मुंबई टाइम्स टीम
एकांकिका स्पर्धांमध्ये सगळ्यात मानाच्या समजल्या जाणाऱ्या आयएनटी आंतरमहाविद्यालयीन मराठी एकांकिका स्पर्धेची चर्चा फेरी नुकतीच पार पडली. यातून पंचवीस कॉलेजांची निवड प्राथमिक फेरीसाठी करण्यात आली आहे. यंदा या स्पर्धेचं ४७ वं वर्ष असून, चर्चाफेरीमध्ये एकूण ४० कॉलेजांचा सहभाग होता. स्पर्धेच्या तालीम फेरीला २४ सप्टेंबरपासून सुरुवात होणार असून, ती २७ सप्टेंबरपर्यंत चालणार आहे.
एकांकिकाप्रेमींना दरवर्षी वेगळं काहीतरी देणारी स्पर्धा म्हणजे आयएनटी आयोजित कै. प्रविण जोशी आंतरमहाविद्यालयीन मराठी एकांकिका स्पर्धा. यंदा चर्चाफेरीमध्ये सहभागी झालेल्या ४० कॉलेजांमध्ये चांगली चुरस होती. इरावती कर्णिक, विश्वास सोहनी, संदेश बेंद्रे या मान्यवरांनी परीक्षक म्हणून काम पाहिलं. एकांकिका, त्यांचं सादरीकरण तसंच एकांकिकांचे विविधांगी पैलू यावर चर्चा फेरी बेतलेली होती. गेल्या दोन वर्षांपासून स्पर्धेचं स्वरूप बदलण्यात आलं असून, मिळणारा प्रतिसाद चांगला आहे. तालीम फेरी दुपारी दोन २ वाजल्यापासून यशवंतराव चव्हाण प्रतिष्ठान, नरिमन पॉईंट येथे घेण्यात येणार आहे. तालीम फेरीतून दहा एकांकिका अंतिम फेरीत जातील. ३ आणि ४ ऑक्टोबर रोजी अंतिम फेरी रंगेल. यावर्षी आर. ए. पोदार, भारतीय विद्यापीठ, भवन्स कॉलेज, अंधेरी ही कॉलेजं प्रथमच आयएनटीच्या रिंगणात दिसून येणार आहेत.