अजय उभारे, कॉलेज क्लब रिपोर्टर
पर्यावरणरक्षणासाठी अनेक कॉलेजं पुढाकार घेत असून, त्यासाठी वेगवेगळे उपक्रम राबवले जात आहेत. पालघरच्या सोनोपंत दांडेकर कॉलेजनं यासाठी एक पाऊल पुढे टाकत कांदळवनांची स्वच्छता मोहिम राबवली. या मोहिमेत जवळपास १५० किलो प्लास्टिकचा कचरा काढण्यात येऊन कांदळवनांची सफाई करण्यात आली.
राज्यात लागू झालेल्या प्लास्टिकबंदीला अनेक कॉलेजांनी पाठिंबा दिल्याचं दिसून येत असून, कॅम्पसमधून प्लास्टिक हद्दपार करण्यात आलं आहे. दांडेकर कॉलेजमध्येही पर्यावरणरक्षणासाठी काही उपक्रम सुरू करण्यात आले आहेत. कांदळवनात मोठ्या प्रमाणावर प्लास्टिक अडकून सागरी पर्यावरणाला त्याचा फटका बसतो.
पर्यावरणाचा समतोल राखण्यात कांदळवनांची असलेली महत्त्वाची भूमिका लक्षात घेता त्यांची सफाई करण्याचं कॉलेजनं ठरवलं. त्यासाठी वन विभागाच्या सहकार्यानं शिरगाव इथे कांदळवन स्वच्छता अभियान आयोजित करण्यात आलं होतं. या अभियानात कॉलेजमधल्या प्राणीशास्त्र व वनस्पतिशास्त्राच्या ७० हून अधिक विद्यार्थ्यांनी सहभाग घेतला होता. या अभियानादरम्यान जवळपास १५० किलो प्लास्टिकचा कचरा कांदळवनातून काढून कांदळवन स्वच्छ करण्यात आलं. या कार्यक्रमास वनविभागाचे वनपाल शांताराम गोरे व कॉलेजमधील प्राणीशास्त्र विभागाचे प्रा. भूषण भोईर, स्वप्नील केणी, पूजा केणी, सुप्रीत नरवणकर, श्रुती दळवी व वनस्पतीशास्त्र विभागाचे दुष्यंत धांगडा, रुद्राक्षी राऊत, दक्षता पाटील हे उपस्थित होते. 'पर्यावरणरक्षणासारख्या महत्त्वाच्या विषयात तरुणाई महत्त्वाची भूमिका बजावू शकते. हा उपक्रम आमच्या दृष्टीनं महत्त्वाचा होता. येत्या काळात कॉलेजच्या विविध विभागांमार्फत विद्यार्थ्यांच्या सहकार्याने पर्यावरणविषयक आणखी उपक्रमही राबवले जातील', अशी माहिती कॉलेजचे प्रिन्सिपल डॉ. किरण सावे यांनी दिली.