'अॅका'च पेला
संगीताचा कार्यक्रम आणि त्यात एकही वाद्य नाही. वाचून आश्चर्य वाटलं ना? हे कसं शक्य आहे असा प्रश्न तुम्हाला पडला असेल. तर हा आहे म्युझिकमधला नवा ट्रेंड, ज्याचं नाव आहे 'अॅकापेला'. तोंडानं वाद्यांचे आवाज काढला जाणारा पाश्चात्य संगीतातला हा एक प्रकार आहे. विल्सन कॉलेजच्या अॅकापेला ग्रुपनं तर विविध कॉलेज फेस्टमध्ये गेल्या चार वर्षांत बाजी मारली आहे...
रामेश्वर जगदाळे, एमडी कॉलेज
कुठल्याही म्युझिकल कार्यक्रमांत गायक-गायिकांबरोबरच महत्त्वाचा असतो तो वाद्यवृंद. पण, कुठल्याही वादकांना सोबतीला न घेता, केवळ तोंडानं वेगवेगळ्या वाद्यांचे आवाज काढत कार्यक्रम सादर करण्याला 'अॅकापेला' असं म्हटलं जातं. आजपर्यंत आपण पाश्चात्य संगीतामध्ये विविध बँडसनी सादर केलेली गाणी ऐकली आहेत. परंतु, सध्या 'अॅकापेला' हा पाश्चात्य संगीतप्रकार सध्या बराच गाजतो आहे. कोणतंही वाद्य न वाजवता व दोन तीन गाण्यांचं मिश्रण करून ह्या प्रकाच्या संगीताची निर्मिती केली जाते. श्वासावर नियंत्रण आणि वेगवेगळ्या आयडिया लढवून वाद्यांचे आवाज तोंडानं काढले जातात.
गेली चार वर्ष नवीन विद्यार्थ्यांना सोबत घेत विल्सन कॉलेजचा अॅकापेला ग्रुप विविध कॉलेजांच्या फेस्टमध्ये बाजी मारतोय. अनुभवी मुलं कॉलेजच्या सुरुवातीला नवीन मुलांची ऑडिशन घेतात. त्यामधून निवडण्यात आलेल्या विद्यार्थ्यांना वर्षभर जाणकार मंडळींच्या शिकण्याची संधी मिळते. केवळ तोंडानं वाद्याचा आवाज काढायचा असल्यानं विद्यार्थ्याच्या आवाजाचा संपूर्ण कस लागतो. अॅकापेलातल्या प्रत्येक स्पर्धेचे नियम वेगळे असतात. त्यामुळे एकदा तयार केलेलं गाणं सगळीकडे सादर केलं जाऊ शकत नाही. त्यामुळे कमी दिवसात कमी वेळेत नवीन गाणं बनवण्याचं आव्हान या टीमवर असतं.
सादरीकरण करताना कुणा एकाच व्यक्तीला महत्त्व दिलं जात नाही. इथे सर्वच महत्त्वाचे असतात. प्रत्येकजण ताकदीनं व मेहनतीनं प्रेक्षकांच्या टाळ्या मिळवत असतो. सायली, श्रद्धा, आभा या तीन मैत्रिणींना अॅकापेलाची आवड निर्माण झाली. त्यानंतर पुढील शिक्षणासाठी विविध शहरात जावं लागलं. परंतु ही आवड त्यांना शांत बसू देत नव्हती. सुट्टीच्या दिवसांत बिल्डिंगच्या, घरच्या कार्यक्रमांत अॅकापेला प्रकारचं संगीत त्या सादर करतात. सादर करताना उत्तम ट्युनिंग जमलं तर एक सुंदर कलाकृती बनते, असं सायलीनं 'मुंटा'शी बोलताना सांगितलं.