'आयसीटी'मध्ये आजपासून 'वोर्टेक्स' फेस्ट
रसायनशास्त्र म्हणजे किचकट नावं, वेगवेगळ्या प्रक्रिया, अॅक्शन-रिअॅक्शन्सबद्दल सांगणारा किचकट विषय असं तुम्हालाही वाटत असेल. पण, या शास्त्रातील गंमत जाणून घ्यायची असेल, तर आयसीटीच्या 'वोर्टेक्स २०१८' या फेस्टिव्हलला हजेरी लावा. आजपासून चार दिवस हा फेस्ट कॅम्पसमध्ये रंगणार आहे..
अजय उभारे, विद्यालंकार इन्स्टिट्यूट ऑफ टेक्नॉलॉजी
माटुंग्याच्या इन्स्टिट्यूट ऑफ केमिकल टेक्नॉलॉजीमध्ये (आयसीटी) आजपासून 'वोर्टेक्स २०१८' हा इंटरकॉलेजिएट फेस्टिव्हल सुरू होत असून, त्या निमित्तानं कॅम्पस गजबजला आहे. २९ ऑक्टोबरपर्यंत चालणाऱ्या या फेस्टिव्हलमध्ये भरपूर मनोरंजनासह विद्यार्थ्यांच्या ज्ञानात भर पडेल असे अनेक इव्हेंट्स होणार आहेत. 'महाराष्ट्र टाइम्स' या फेस्टिव्हलचा मीडिया पार्टनर आहे.
रसायन क्षेत्रासंबंधित असणारा 'वोर्टेक्स' हा कॉलेजविश्वातल्या अनेक मोठ्या फेस्टिवल्सपैकी एक आहे. केमिस्ट्रीप्रेमींना अनेक नवनव्या गोष्टी शिकण्याची संधी 'वोर्टेक्स'च्या निमित्तानं विद्यार्थ्यांना मिळणार आहे. सायन्स, टेक्नॉलॉजी, इंजिनीअरिंग, मॅथेमॅटिक्सवर आधारित काही इव्हेंट्स या फेस्टमध्ये होणार आहेत. रसायन, इंजिनीअरिंग, औषधनिर्माणशास्त्रात वापरण्यात येणारे रंग, तेल, पॉलीमर फार्मसी आणि फार्मास्युटिकल संबंधित तंत्रज्ञान, जैविकशास्त्र, जैविक तंत्रज्ञान, व्यवसाय व्यवस्थापन, जाहिरात अशा अनेक विषयांना या इव्हेंट्समध्ये महत्त्वाचं स्थान देण्यात आलं आहे. त्या दृष्टीनंच विविध इव्हेंट्सची आखणी करण्यात आली आहे.
वेगवेगळ्या तीन विभागांत विविध प्रकारच्या २० स्पर्धांचं आयोजन 'वोर्टेक्स'मध्ये करण्यात आलं आहे. औषधनिर्माण शास्त्र, रसायनशास्त्र, अद्ययावत तंत्रज्ञान या विषयांवर पेपर प्रेझेंटेशन, क्विझ, मॅनिफेस्टो नावाची पोस्टर प्रेझेंटेशन, इंडस्ट्री डिफाईन्ड प्रॉब्लेम या स्पर्धांची चुरस यात पाहायला मिळेल. फेस्टमध्ये सहभागी होण्यासाठी 'वोर्टेक्स'च्या वेबसाइटला भेट द्यायची आहे. www.vortexictmumbai.org
'यत्न' आणि 'फ्लॅगशिप'
संशोधन क्षेत्रात येणाऱ्या विद्यार्थ्यांनी फक्त पैशांच्या मागे न धावता, समाजाप्रती आपली बांधिलकी लक्षात घेऊन संशोधन करायला हवं असं सांगितलं जातं. म्हणूनच 'यत्न' व 'फ्लॅगशीप' या दोन वेगळ्या स्पर्धांचं आयोजनही करण्यात आलं आहे. 'मास्टर क्लास' माध्यमातून वेगवेगळी वर्कशॉप तसेच इंडस्ट्रीमधील मान्यवरांसोबत संवाद शिबिरांचा समावेश करण्यात आला आहे.
फेस्टिव्हलची वैशिष्ट्यं
० तीन विभागांत एकूण २० स्पर्धा
० मान्यवरांसोबत संवाद शिबीरं
० संशोधनावर आधारित विशेष स्पर्धा