ग्लॅमरस आर.एक्स

>> दीपाली सकपाळ, कॉलेज क्लब रिपोर्टर

कुठे चेहऱ्याची रंगरंगोटी चालू तर कुठे रॅम्पवर उतरण्याची लगबग...अखेर सुरु झालेला रॅम्प वॉकचा थरार. एरवी मोठमोठया फॅशन शोमध्ये पाहायला मिळणारं हे दृश्य बॉम्बे कॉलेज ऑफ फार्मसीमध्ये रंगलं होतं. 'आर. एक्स' या फेस्टिव्हलच्या फॅशन शोच निमित्त होतं. 'महाराष्ट्र टाइम्स' या फेस्टिव्हलचा मीडिया पार्टनर होता.

'आर एक्स' या फेस्टमधील फॅशन शोची उत्सुकता शिगेला पोहोचली होती. यंदा 'अराऊंड द वर्ल्ड' अशी थीम असणाऱ्या या फेस्टिव्हलमध्ये मुंबईतील अनेक कॉलेज सहभागी झाले होते. राशीचक्र, जगाची सफर, इंडोवेस्टर्न अशा अनेक थीम विद्यार्थ्यांनी सादर केल्या. यामध्ये अखेर बाजी मारली ती जुहूच्या सी. यू. शहा या फार्मसी कॉलेजने. 'ग्लॅमर अँड ग्लिटर' अशी थीम असणाऱ्या या कॉलेजने जगाची झगमगती बाजू दाखवून प्रथम क्रमांक पटकवला. तर नरसी मोनजी कॉलेजने रॅम्प वॉकमधून जंगल बुकची सफर घडवत दुसरा क्रमांकाचा मान मिळवला. गेहलोत इन्स्टिट्यूट ऑफ फार्मसी या कॉलेजने तिसरा क्रमांक पटकावला. फॅशनच्या जगातील मान्यवरांनी या शोच परीक्षण केलं. नेहमी औषध-गोळ्यांच्या दुनियेत रमणाऱ्या भावी फार्मसिस्टना फॅशन दुनियेची रंजक सफर या फेस्टिव्हलमुळे घडली.