ब्रेक थ्रू धम्माल

>> अस्मिता कदम/ दिपाली बुद्धिवंत, कॉलेज क्लब रिपोर्टर

मार्केटिंग आणि फायनान्स या विषयांचा अभ्यास करताना जितका कंटाळा येतो तितकंच या विषयांचं ज्ञान व्यावहारिक जीवनात वापरून एखादा व्यवसाय सहज सुरु करु शकतो. असा एखादा व्यवसाय सुरु करायचा असल्यास त्यासाठी भांडवल कसं मिळवायचं आणि आपल्या वस्तूची बाजारात मागणी कशी निर्माण करायची यातच कितीतरी जणांना नाकीनऊ येतात. पण याच ज्ञानाची व्यावहारिक रित्या मज्जा लुटण्यासाठी एच. आर.कॉलेजच्या फेमा क्लबने 'ब्रेक थ्रू' या इव्हेंटचं आयोजन केलंय. १६ ते १७ फेब्रुवारी रोजी हा फेस्ट रंगणार असून 'महाराष्ट्र टाइम्स' या फेस्टचा मीडीया पार्टनर आहे.

'शार्क टँक' या स्पर्धेतून विद्यार्थ्यांमध्ये नावीन्यपूर्ण आणि हटके बिझनेस कल्पना असतील तर त्या साकार करण्याची संधी मिळणार आहे. 'बजेट ब्रेकर' स्पर्धेत स्पर्धकांना थोड्या पैशातून बिझनेस कशाप्रकारे चालवायचा, यासाठी कल्पना लढवाव्या लागतील.'जॅम' म्हणजेच 'जस्ट अ मिनिट' या स्पर्धेत विद्यार्थ्यांना एका मिनिटांत प्रश्नाचं बरोबर उत्तर द्यायचंय. 'पिक्चर स्पीक थाउजन्ड वर्ड' या स्पर्धेत फोटोग्राफर्सना हटके अन् भन्नाट फोटो काढायचेत. नंतर ते फोटोफेसबुकवर इव्हेंटच्या पेजला टॅग करून अपलोड करायचे आहेत. 'कार्ड-ओ-डील' ही स्पर्धा उनो या कार्डच्या मदतीने खेळायची आहे. यामध्ये स्पर्धकांची बुद्धिमत्ता, नशीब आणि त्यांची खेळावरची पकड बघितली जाईल. 'कॅटलेझर'या गेममध्ये विद्यार्थ्यांचा स्वतःवर किती आत्मविश्वास आहे हे पाहिलं जाईल. त्यामध्ये स्पर्धकांना काही वस्तू विकून नफा मिळवायचाय.

'मिस्टरी हंट' या स्पर्धेत शेरलॉक होम्सप्रमाणे स्पर्धकांना दिलेल्या केसेस सोडवायच्या आहेत. या इव्हेंटमध्ये स्पर्धकांना एक परिस्थिती दिली जाईल ती त्यांना विशिष्ट वेळेत सोडवायची आहे, या इव्हेंटमध्ये विद्यार्थ्यांनी खेळ आणि वेळ या दोन्हींचा समतोल राखायचा आहे. 'स्टुडंट ऑफ द इयर' ही स्पर्धा सर्वात हटके आणि मजामस्तीपर होणार असून यात थोडासा ट्विस्ट म्हणून याचे रुल्स स्पर्धेच्या वेळीच सांगण्यात येणार आहेत.'मॉक स्टॉक एक्सचेंज'सारखी स्पर्धा फक्त कॉलेजच्या सी.एल (कंटिंजंट लीडर)साठी आहे. अशा हटके स्पर्धा आयोजनांसोबत विद्यार्थ्यांना बऱ्याच गोष्टी शिकायलाही मिळणार आहेत.