नोकरीची ‘प्लेस’ चुकतेय

बड्या कंपनीत कॅम्पस प्लेसमेंट मिळाली म्हणून इंजिनीअरिंगचे विद्यार्थी खुशीत असतात. प्रत्यक्षात कंपनीत रुजू झाल्यावर त्यांना कळतं, की ही नोकरी तर बॅकऑफिसची किंवा कॉलसेंटरची आहे. इंजिनीअरिंग कॉलेजांमध्ये विद्यार्थ्यांची प्लेसमेंटच्या नावाखाली अशी फसवणूक होते आहे…

इंजिनीअरिंगच्या शेवटच्या वर्षाला असणाऱ्या विद्यार्थ्यांचं लक्ष लागलेलं असतं ते प्लेसमेंटकडे. यंदा आपल्या कॉलेजमध्ये कोणत्या कंपन्या येणार? आपलं प्लेसमेंट कोणत्या कंपनीत होणार? पॅकेज काय असेल? याची त्यांना उत्सुकता असते. अनेकदा त्यांना चांगल्या कंपनीत नोकरी मिळतेही. पण ही नोकरी असते त्या कंपनीच्या बॅकऑफिसमध्ये किंवा कॉलसेंटरमध्ये. त्यामुळे या विद्यार्थ्यांची निराशा होते. सध्या मुंबईतल्या अनेक कॉलेजांमध्ये प्लेसमेंटच्या नावाखाली विद्यार्थ्यांची अशीच फसवणूक होत असून, विद्यार्थ्यांमध्ये याबद्दल नाराजी आहे.
कॅम्पस प्लेसमेंटमध्ये कॉलेजांमधल्या त्या-त्या शाखांच्या टॉपर्सना कंपन्यांमध्ये प्लेसमेंट होतं. पण सध्या अनेक इंजिनीअरिंग कॉलेजांमध्ये प्लेसमेंटचं चित्र वेगळंच पाहायला मिळतंय. कर्जतच्या एका नामांकित कॉलेजमध्ये एक बडी कंपनी प्लेसमेंटसाठी आली. त्यांनी त्या कॉलेजांमधील प्रत्येक शाखेच्या टॉपर विद्यार्थ्यांना नोकऱ्या दिल्या. त्याप्रमाणे ते विद्यार्थी नोकरीच्या ठिकाणी रुजूही झाले. पण नोकरीच्या पहिल्याच दिवसापासून त्यांना कंपन्यांच्या बॅकऑफिसमध्ये किंवा कॉल सेंटरमध्ये काम देण्यात आल्याचं समोर आलं. मुळात प्लेसमेंट होत असताना एखाद्या कंपनीत त्यांना कोणत्या पदासाठी घेण्यात आलंय? पॅकेज किती असेल अशी सगळी व्यवस्थित माहिती कॉलेज प्रशासनाकडून किंवा त्या कंपनीकडून सांगितलीच जात नसल्याचा विद्यार्थ्यांचा अनुभव आहे.

प्लेसमेंट सेल काय करताहेत?
बहुतांश कॉलेजांमध्ये प्लेसमेंट सेल असतात. कॉलेजांमध्ये प्लेसमेंटच्या नावाखाली असं विद्यार्थ्यांना अंधारात ठेवलं जात असेल, तर त्या-त्या कॉलेजांच्या प्लेसमेंट सेलनं यामध्ये लक्ष घालणं अपेक्षित आहे. मात्र कित्येक कॉलेजांमध्ये नावापुरतेच प्लेसमेंट सेल असतात. त्यांना सक्रीय करणं गरजेचं आहे.

कॉलेजांची जबाबदारी
विद्यार्थी इंजिनीअरिंगच्या कोणत्या शाखेचा आहे त्यानुसार, त्याला प्लेसमेंटमध्ये जॉब प्रोफाइल देणं आवश्यक आहे. दुसरं म्हणजे एखादी नामांकित कंपनी कॉलेजमध्ये प्लेसमेंटसाठी येत असेल, तर कॉलेज प्रशासनानं विद्यार्थ्यांना त्याची संपूर्ण माहिती देणं ही कॉलेजची जबाबदारी आहे. त्याशिवाय कंपन्यांनीही विद्यार्थ्यांच्या मुलाखती घेण्याआधी कंपनीविषयी, ज्या पदासाठी त्यांना घेण्यात येत आहे या सगळ्याची माहिती सांगणारं प्रेझेंटेशन सादर करणं अपेक्षित आहे.
- डॉ. सुरेश उकरंडे, समन्वयक, तांत्रिक शिक्षण, मुंबई विद्यापीठ

कारवाई व्हावी
प्लेसमेंटच्या नावाखाली विद्यार्थ्यांच्या करिअरशी, भविष्याशी असं खेळणं अत्यंत चुकीचं आहे. कोणत्याही कॉलेजांमध्ये असं घडत असेल तर तात्काळ त्या विद्यार्थ्यांनी आमच्याशी संपर्क साधावा. तसंच आता जे निदर्शनास येत आहे, त्याची विद्यापीठाकडून चौकशी होऊन तातडीने त्या कॉलेजवर कारवाई व्हावी.
- सुधाकर तांबोळी, माजी सिनेट सदस्य