फॅशन का है ये जलवा

>> प्रियांका गवळी, कोमल काणेकर, कॉलेज क्लब रिपोर्टर

आजची पिढी पाश्चात्य संस्कृतीचं अनुकरण करत असताना आणि स्वतःला आधुनिक म्हणवत आहे. एकीकडे याच तरुणांना 'इंडिया लाइज इन यू' अशी आगळीवेगळी थीम घेऊन त्यांच्या सामर्थ्याची जाणीव करून देण्याचा उत्तम प्रयत्न वांद्रे येथील शिला रहेजा स्कूल ऑफ बिजनेस मॅनेजमेंट अँड रिसर्च यांनी केला. निमित्त होतं त्यांच्या फेस्टिव्हल 'स्वागम'च. नुकताच मोठ्या दिमाखात रंगलेल्या या फेस्चटचा 'महाराष्ट्र टाइम्स' मीडिया पार्टनर आहे. या फेस्टचा आकर्षणाचा केंद्रबिंदू ठरला तो फॅशन शो.

तीन दिवसीय 'स्वागम'मध्ये तब्बल ४५ वेगवेगळ्या स्पर्धांचं आयोजन करण्यात आलं होतं. तंत्रज्ञान, कला आणि खेळ यांचा उत्तम मेळ साधत 'स्वागम'ने अनेकांना त्यांचं कौशल्य दाखवण्यासाठी हक्काचं व्यासपीठ मिळूवन दिलं. या फेस्टची क्रिकेटच्या सामन्याने जोरदार सुरुवात झाली. अनेक कॉलेजांनी क्रिकेटच्या मैदानात एकमेकांना काटे की टक्कर दिली. त्यानंतर रंगल्या टेक्निकल क्वीझ, आय.पी रोबो रेस, इनोव्हेट द ब्रीज अशा काहीशा अनोख्या आणि हटके स्पर्धाही रंगल्या. 'एड मॅड शो'मध्ये स्पर्धकांना रंग वापरून जाहिरात बनवायची होती. धडाकेबाज डान्स आणि ओपन थीम असलेल्या 'फॅशन शो'ने स्वागमच्या तिसऱ्या दिवसाच्या सोहळ्यात अनेक रंग भरले. फॅशन शो हा परिक्षकांच्या विशेष पसंतीस पडला. जवळपास २० स्पर्धांमधे लाला कॉलेजच्या विद्यार्थ्यांनी बाजी मारत स्वागमच्या अनेक बक्षिसांवर आपलं नाव कोरलं.

'स्वागमच्या निमित्ताने अनेक गोष्टी शिकायला मिळाल्या. अनेकांना हक्काचं व्यासपीठ मिळवून देण्याचा प्रयत्न पुढे देखील नेहमीच असेल', असं फेस्टिव्हलचे प्रमुख आतिश भालेराव यांनी सांगितलं.