'कला साधू' थीमचं आकर्षण
ईशा सानेकर, जे. जे. इन्स्टिट्यूट ऑफ अप्लाइड आर्ट
कलेचं माहेरघर समजल्या जाणाऱ्या जे. जे. स्कूल ऑफ आर्टमध्ये दररोज नवीन कलाविष्कार घडत असतात. कलंदर विद्यार्थ्यांच्या कलाकारीला आकार देण्यात ही संस्था महत्त्वाची भूमिका बजावते. जे. जेच्या अप्लाइड आर्ट विभागाचं प्रदर्शन आजपासून भरणार आहे. १९ ते २३ फेब्रुवारी दरम्यान हे प्रदर्शन भरणार असून ते सर्वांसाठी खुलं आहे.
गेली ८५ वर्षं कलेची साधना करणारं जे. जे. एखाद्या तपस्वी साधू समान भासतं. हाच मुद्दा लक्षात घेऊन यंदाच्या प्रदर्शनाची थीम कला साधू अशी ठेवण्यात आली आहे. वार्षिक प्रदर्शनाच्या काळात कलात्मक आणि आकर्षक इन्स्टॉलेशन्सनं कॅम्पस सजवण्यात येतो. यंदाच्या प्रदर्शनात ग्राफिक डिझाइन, लाइफ स्टडी, टूडी आणि थ्रीडी डिझाइन, जाहिरातकला या पायाभूत विषयांसोबत कम्प्युटर ग्राफिक्स, डिस्प्ले डिझाइन, टायपोग्राफी आणि कॅलिग्राफी, इलस्ट्रेशन, फोटोग्राफी या विषयांच्या विद्यार्थ्यांच्या निवडक कलाकृती पाहायला मिळतील. अप्लाइड आर्टच्या चारही वर्षांच्या विद्यार्थ्यांनी घडवलेल्या कलाकृतीचा आढावा या प्रदर्शनात घेतला जाणार आहे. दिग्दर्शक पुरुषोत्तम बेर्डे आणि अभिनेते रघुवीर कुलकर्णी यांच्या हस्ते या प्रदर्शनाचं उद्घाटन झालं. अप्लाइड आर्ट विभागाच्या प्रदर्शनाबरोबरच वार्षिक पारितोषिक वितरण समारंभ, सांस्कृतिक कार्यक्रम, 'अंतरंग' या एकांकिकेचं सादरीकरण आणि 'जे. जे. अमेझ' या वार्षिक अंकाचं प्रकाशनही याच दरम्यान होणार आहे.
कधी? १८ ते २३ फेब्रुवारी
कुठे? जे. जे. इन्स्टिट्यूट ऑफ अप्लाइड आर्ट, फोर्ट
वेळ? स. १०.३० ते ५.३० वाजेपर्यंत