'सायनर्जी'चा केमिकल लोचा

>> अजय उभारे, कॉलेज क्लब रिपोर्टर

फोटो- विनय राऊळ

'अॅक्ट-रीअॅक्ट', 'कॅल्श ऑफ क्लॅन्स' आणि 'स्पिन-अ-टेल' यासारख्या एकापेक्षा एक हटके इव्हेंटमुळे माटुंग्याच्या रुपारेल कॉलेजच्या सायनर्जी फेस्ट चांगलाच रंगला. विविध रंजक गेम्समधून मानसिक स्थितीचा ठाव घेणारा अशा या फेस्टची कॉलेज विश्वात चर्चा आहे. या फेस्टचा घेतलेला हा आढावा...

डीजेचा दणदणाट नाही, सिनेताऱ्यांची झगमग नाही... तरीही विद्यार्थ्यांच्या मोठ्या उत्साहात, जोरदार फेस्टिव्हल पार पडला. असं चित्र पाहायला मिळालं ते माटुंग्याच्या रुपारेल कॉलेजच्या 'सायनर्जी' या फेस्टमध्ये. रुपारेल कॉलेजच्या सायकोलॉजी विभागाचा हा फेस्ट होता. फेस्टिव्हलच्या सुरुवातीपासूनच 'सायानर्जीचे' विविध रंग पाहायला मिळाले. 'महाराष्ट्र टाइम्स' या फेस्टिव्हलचा मीडिया पार्टनर होता.

फेस्टिव्हलची सुरुवात निर्मला निकेतन कॉलेज ऑफ होम सायन्सच्या ह्युमन डेव्हलपमेंट विभागाच्या प्रमुख डॉ. निर्मला आल्मेडा यांच्या परिसंवादाने झाली. यावर्षीच्या 'सायनर्जी' फेस्टमध्ये अनेक मजेदार खेळांचं आयोजन टीम सायनर्जीने केलं होतं. 'अॅक्ट-रीअॅक्ट', 'कॅल्श ऑफ क्लॅन्स', 'स्पिन-अ-टेल'सारख्या मज्जेशीर स्पर्धाही यंदा कॉलेज कॅम्पसमध्ये पाहायला मिळाल्या. 'स्पिन-अ-टेल' या खेळात दिल्या गेलेल्या थीम किंवा शब्दावरून मजेशीर गोष्ट रचून सांगायची होती.

सायकोलॉजी विभागाचा फेस्टिव्हल असला तरीही विद्यार्थ्यांमधील विविध कलागुणांना वाव मिळेल अशा हटके स्पर्धाही होत्या. फेस्टिव्हलच्या निमित्ताने विद्यार्थ्यांना नवनवीन गोष्टी शिकता याव्यात आणि त्या गोष्टींचा भविष्यातही उपयोग व्हावा, असा या फेस्टिव्हल मागचा मूळ हेतू असल्याचं टीम सायनार्जी आवर्जून सांगते.