सिद्धेश सावंत, कॉलेज क्लब रिपोर्टर
सध्या जगभरात करोनानं थैमान घातलं आहे. रुग्णालयात डॉक्टर आणि नर्सेस अहोरात्र रुग्णांची सेवा करत आहेत. वाढत्या रुग्णांच्या संख्येमुळे रक्तपेढीमध्ये रक्ताचा तुटवडाही भासू शकतो, म्हणून रक्तदान शिबिरांचं आयोजन करण्याचं आवाहन राज्य सरकारनं केलं होतं. यालाच प्रतिसाद म्हणून विलेपार्ले येथील डहाणूकर कॉलेजच्या एनएसएस युनिटनं नायर हॉस्पिटलच्या मदतीनं कॉलेजमध्ये रक्तदान शिबिराचं आयोजन केलं होतं. विशेष म्हणजे कॉलेजच्या आजी-माजी विद्यार्थ्यांनी यासाठी पुढाकार घेतला होता.अगदी कांदिवली ते सांताक्रूजपासून रक्तदाते या शिबिरात सामील झाले होते. सुरक्षित वावर (सोशल डिस्टनसिंग), स्वच्छता आणि इतर नियमांचं पालन करून एक वेगळाच आदर्श कॉलेजनं इतरांसामोर ठेवला आहे. रक्तदात्यांनीही या उपक्रमाचं तोंडभरून कौतुक केलं. कॉलेजनं राबवलेला हा उपक्रम अतिशय स्तुत्य आहे.
रक्तदान आणि सुरक्षित वावर
सध्याच्या काळात सुरक्षित वावर आणि इतर नियमांचं पालन करणं आपल्याच सुरक्षेच्या दृष्टीनं गरजेचं आहे. हे सगळे मुद्दे लक्षात ठेवून कॉलेजनं शिबिराच्या दहा दिवस आधीच इच्छुक रक्तदात्यांना ऑनलाइन नोंदणी करण्यास सांगितली होती. व्हॉट्सअॅप ग्रुप बनवून नोंदणी केलेल्या इच्छुक रक्तदात्यांना संबंधित माहिती वेळोवेळी दिली जात होती. पाच-पाच रक्तदात्यांची तुकडी बनवून त्यांना ठरावीक वेळेत रक्तदान करायला येण्यास सांगितलं. जेणेकरून एकाच वेळी गर्दी होणार नाही; तर लांब राहणाऱ्या रक्तदात्यांना पुन्हा घरी सुखरूप पोहोचवण्याची व्यवस्थाही कॉलेजनेचं केली होती.
नियमांचं काटेकोरपणे पालन
१. कॉलेजध्ये येणाऱ्या प्रत्येक रक्तदात्याला मास्क लावणं बंधनकारक होतं तर स्वयंसेवकांसाठीही मास्क, हातमोजे, सेफ्टी किट याची व्यवस्था होती.
२. कॉलेजमध्ये प्रवेश घेताच सर्व गोष्टी सॅनिटाइज करण्यात आल्या.
३. गर्दी हाऊ नये म्हणून एक प्रतीक्षा कक्ष तयार केला होते, तिथेही दोन खुर्च्यांमध्ये सुरक्षित अंतर ठेवण्यात आलं होतं.
४. खुर्च्या, टेबल, रक्तदात्यांसाठी वापरलेल्या गाद्या सतत सॅनिटाइज करण्यात येत होत्या.
५. रक्त देताना दोन रक्तदात्यांमधील अंतरही नेहमीपेक्षा जास्त ठेवण्यात आले होते.
००००
करोनाच्या पार्श्वभूमीवर नायर हॉस्पिटलमध्ये रक्ताचा तुटवडा भासू लागल्यामुळे त्यांनी आम्हाला शिबिरासाठी विनंती केली. सध्याच्या परिस्थितीत रक्कदातेही त्यांच्यापर्यंत पोहोचू शकत नव्हते, म्हणून आम्ही त्यांच्यातील दुवा बनलो. प्रोफेसर पगार आणि माजी विद्यार्थी चेतन काते यांनी अतिशय उत्तमरीत्या या शिबिराचं आयोजन केलं होतं. मी रक्तदात्यांचे मनापासून आभार मानतो.
- डॉ. ज्ञानेश्वर डोके, प्रिन्सिपल, डहाणूकर कॉलेज