मुंबई विद्यापीठातर्फे आयोजित केल्या जाणाऱ्या युवा महोत्सवाला कॉलेजविश्वात मानाचं स्थान आहे. यूथ फेस्टिव्हलमध्ये जिंकण्यासाठी विद्यार्थी दिवसरात्र मेहनत घेत असतात. अनेक स्पर्धांमध्ये बाजी मारत ठाणे येथील जोशी-बेडेकर कॉलेजनं उपविजेतेपद मिळवलं आहे. त्याविषयी...
००००
मुंबई टाइम्स टीम
विद्यार्थ्यांच्या अभ्यासाबरोबरच इतरही कलागुणांना वाव मिळण्यासाठी मुंबई विद्यापीठ दरवर्षी मोठ्या उत्साहानं युवा महोत्सवाचं आयोजन करते. नुकताच गेल्या वर्षीच्या महोत्सवाचा निकाल जाहीर झाला. यात ठाण्याच्या जोशी-बेडेकर कॉलेजने तब्बल २८ पारितोषिकं मिळवत दुसऱ्या क्रमांकाचा सर्वसाधारण विजेतेपदाचा चषक मिळवला. पहिला क्रमांक मुंबईतील पोदार कॉलेजनं पटकावला.
दरवर्षी साधारण सहा ते सात महिने आधीपासून जोशी-बेडेकर कॉलेजमध्ये या महोत्सवाची तयारी सुरू होते. व्यवस्थित नियोजन आणि अभ्यास करूनच विद्यार्थी स्पर्धेमध्ये उतरतात. प्राध्यापकांची एक वेगळी टीम विद्यार्थ्यांबरोबर सतत असते, असं ठाणे विभागाच्या समन्वयक डॉ. अर्चना प्रभुदेसाई यांनी सांगितलं. यंदा कॉलेजची मराठी एकांकिका 'चनं खाऊ लोखंडाचं'मधील विशाल शिंगे आणि अस्मिता सेहगन, तर 'मिश्मी' या हिंदी एकांकितील वैष्णवी पाटील यांनी पारितोषिकं पटकावली. एकपात्री स्पर्धेत मराठीसाठी युवराज ताम्हणकर आणि हिंदीसाठी वैष्णवी पाटील यांना उत्तेजनार्थ पारितोषिकं मिळाली. शास्त्रीय आणि सुगम संगीतासाठी शर्वरी बापटला तर वेस्टर्न सोलो सिंगिंगसाठी तन्वी पैठणकरनं बक्षिस पटकावलं. तालवाद्यासाठी अथर्व चांदोरकर, ईशान भट तर नाट्यसंगीतासाठी अभिजीत केतकर यांना पारितोषिक मिळाली आहेत. वादविवाद स्पर्धा, निबंधलेखन, कथा सादरीकरण या स्पर्धांमध्ये फरियाल सय्यद, गार्गी गोरेगावकर, प्रथमेश उंबरे, किमया तेंडुलकर, स्वरांगी शेडगे या विद्यार्थ्यांनी पारितोषिकं मिळवली आहेत. रांगोळी, मेंदी, कोलाज, कार्टून आणि छायाचित्र या स्पर्धांमध्ये धनश्री भोईर, प्रत्युषा नार्वेकर, साना शरीफ, निशा विश्वकर्मा, सोहम दादरकर यांनी यंदा चमकदार कामगिरी बजावली आहे. त्यामुळे कॉलेजच्या विद्यार्थी आणि प्राध्यापक यामध्ये आनंदाचं वातावरण आहे. लॉकडाउनमुळे एकमेकांना भेटून हे यश साजरं करता येत नाही, अशी खंत अनेक विद्यार्थ्यांनी व्यक्त केली.
००००
जोशी-बेडेकर कॉलेज अभ्यासाबरोबरच विद्यार्थ्यांच्या सर्वांगीण विकासालाही महत्त्व देतं. हे यश विद्यार्थ्यांच्या आणि प्राध्यापकांच्या मेहनतीचं फळ आहे.
- डॉ. सुचित्रा नाईक, प्रिन्सिपल, जोशी-बेडेकर कॉलेज