केतकी मोडक, विद्यावर्धिनीज कॉलेज
येणाऱ्या अडचणींनी डगमगून न जाता विद्यावर्धिनीज कॉलेजच्या स्टुडंट काऊन्सिलच्या सर्व विद्यार्थ्यांनी 'झील' हा फेस्ट यशस्वीरित्या पार पाडला. उत्तम टीमवर्कमुळे हा फेस्ट गाजला. 'द इकोज ऑफ सायलेन्स' अशी थीम असलेला 'झील' कॉलेज कॅम्पसमध्ये रंगला. 'महाराष्ट्र टाइम्स' या फेस्टचा मीडिया पार्टनर होता.
शानदार उद्घाटन
लेझीम आणि ढोल-ताशांच्या गजरामध्ये या फेस्टिव्हलचं शानदार उद्घाटन करण्यात आलं. दमदार उद्घाटनानंतर पुढील तीन दिवस नृत्य, संगीत, लेखन, चित्र यांसारख्या कलांपासून पाककलेसारख्या बऱ्याच कलांना वाव देणाऱ्या अनेकविध स्पर्धा घेण्यात आल्या. ऑक्टेव्हज आणि डीजे नाइटमध्ये विद्यार्थ्यांनी धमाल केली.
प्यार की चिठ्ठी
यावर्षीच्या 'झील'मध्ये विद्यार्थ्यांना त्यांच्या आवडत्या गोष्टीला किंवा व्यक्तीला लिहिलेल्या प्रेमपत्रांचं वाचन करण्याची संधी मिळाली. यामध्ये आवडलेल्या खाद्यपदार्थाला लिहिलेलं प्रेमपत्र आणि लग्नाच्या ५०व्या वाढदिवसाला पतीनं आपल्या पत्नीला लिहिलेलं प्रेमपत्र विशेष आकर्षण ठरलं.
अभिनयाला वाव
इंजिनीअरिंगच्या विद्यार्थ्यांमधील अभिनय कौशल्याची चुणूक दाखवणारी 'नाट्यमय' ही एकांकिका स्पर्धा यावर्षीसुद्धा लक्षवेधी ठरली. यामध्ये इंजिनीअरिंगच्या विद्यार्थ्यांनी 'हम भी किसीसे कम नही है' असं म्हणत उत्तमोत्तम एकांकिकांचं सादरीकरण केलं. 'देव केवळ मूर्तीत न पहाता प्रत्येक व्यक्तीत देव पहावा' असा संदेश देणाऱ्या 'विसर्जन' या इलेक्ट्रॉनिक्स अँड टेलिकम्युनिकेशन विभागाच्या एकांकिकेनं या स्पर्धेत बाजी मारत प्रथम क्रमांक पटकावला. सर्वोत्कृष्ट अभिनेता यश कुमठेकरनं आणि सर्वोत्कृष्ट अभिनेत्रीचा दीक्षा कामथ आणि केतकी मोडक यांनी मान पटकावला.