आर्थिक मंदीचा फटका सर्वच क्षेत्रात बसत असाताना कॉलेज फेस्टिव्हल्सही त्याच्या कात्रीत सापडले आहेत. काही प्रायोजकांनी ऐनवेळी माघार घेतली आहे तर काहींनी रकमेत घट केली आहे. अशा परिस्थितीत फेस्टचं आयोजन करणाऱ्या टीम्स काय करणार आहेत? त्याविषयी...
००००
मुंबई टाइम्स टीम
अलीकडेच हिवसाळा संपून कॉलेजिअन्सच्या आवडत्या 'फेस्टिव्हल' ऋतूला सुरुवात झालीय. मुंबईतील अनेक प्रसिद्ध कॉलेजांच्या फेस्टिव्हल्स टीम फेस्ट आयोजनासाठी सज्ज झाल्या आहेत. एकीकडे पुरेपूर एनर्जी, ओसंडून वाहणारा उत्साह शिगेला पोहोचला असताना 'नो स्पॉन्सरशिप'च्या प्रश्नानं यंदा बहुतांश फेस्टिव्हल टीम्स चिंतेत आहेत. यंदा सर्वच क्षेत्रांवर परिणाम करणाऱ्या आर्थिक मंदीचा फटका कॉलेज फेस्टिव्हल्सलाही बसला आहे. अनेक मोठ्या स्पॉन्सर्सनी ऐनवेळी फेस्टिव्हल्समधून माघार घेतलीय तर काहींनी स्पॉन्सर्संनी रकमेत घट करण्यास सुरुवात केली आहे. परिणामी, कमी रकमेत अधिक उठावदार फेस्टिव्हल आयोजित करण्याचं आव्हान या टीम्ससमोर आहे.
एकीकडे परीक्षांचे निकाल लागतात, पुढचं सत्र सुरु होतं आणि सोबतच फेस्टिव्हल्सच्या आयोजनाची लगबग सुरु होते. डिसेंबर महिन्यातच जवळपास २० हून अधिक कॉलेजांचे फेस्ट असतात. फेस्टच्या आयोजनासाठी मोठं आर्थिक पाठबळ लागतं. मात्र आर्थिक मंदीमुळे अनेक मोठ्या कंपन्या दरकपातीच्या फेऱ्यातून जात असल्यानं यंदा फेस्टिव्हल्सच्या नियोजनातही त्यांच्या सहभागाबाबत आधीपासूनच चिंता व्यक्त केली जात होती. एखाद्या फेस्टच्या नियोजनासाठी लागणारे तीन महिने लक्षात घेता फेस्ट कोऑर्डिनेटर्सनी जुलै महिन्यापासूनच मुख्य प्रायोजकांचा शोध घेण्यास सुरुवात केली होती. मात्र, सुरुवातीच्या काळात कंपन्यांकडून माघारी धाडलं जात असल्याचं अनेक फेस्ट टीमच्या कोऑर्डिनेटर्सकडून कळलं. अखेर ऑक्टोबर महिन्याच्या सुरुवातीला पुन्हा एकदा प्रयत्न केल्यानंतर अनेक कंपन्यांनी प्रायोजकत्व देण्यास सहमती दर्शवली. त्यानुसार फेस्टिव्हल्स टीम्सनं तत्काळ नियोजनाला सुरुवात देखील केल्याचं कळत आहे. अर्थात मोठ्या प्रायोजकांच्या शोधात असताना इतर छोट्या-मोठ्या जबाबदाऱ्या पार पाडण्यासाठी लागणाऱ्या छोट्या प्रायोजकांना राजी करण्यात या टीम्स यशस्वी ठरल्या आहेत. त्यामुळे फेस्टिव्हल्ससाठी गरजेचं असलेलं सर्व प्राथमिक नियोजन पूर्ण झालेलं आहे.
मोठ्या कंपन्यासह सर्वानाच या आर्थिक मंदीचा फटका मोठ्या प्रमाणात बसल्यानं स्पॉन्सरशिपची रक्कम देताना प्रत्येक स्तरावर टाळाटाळ होत होती. मात्र बहुतांश टीम्सनी आपलं कौशल्य पणाला लावत ही अडचण तूर्तास दूर केली आहे. तसंच अनेक फेस्ट टीम्सना मनासारखी रक्कम न मिळाल्यानं आयोजनाच्या दृष्टीनं बऱ्याच मर्यादा येणार आहेत. 'काहीच नसण्यापेक्षा काही तरी मिळालं' या सूत्रानुसार कॉलेज फेस्टिव्हलच्या नियोजनात संमिश्र भावना दिसून येत आहेत. पैशाचा विचार न करता क्रिएव्हीटीचा वापर करून फेस्ट अधिक भव्य कसा होईल यासाठी कोऑर्डिनेटर्स आणि कोअर कमिटी कामाला लागल्या आहेत.
००००
आयआयटी टेकफेस्ट सर्वात मोठ्या फेस्टिव्हल्सपैकी एक आहे. त्यामुळे प्रायोजक शोधताना फार कष्ट घ्यावे लागले नाहीत. सुरुवातीला काही कंपन्यांनी थोडा निरुत्साह दाखवला. पण, टेकफेस्टची लोकप्रियता पाहता प्रायोजकांनी काही दिवसातच होकार कळवला.
- सिद्धार्थ मणियार, मीडिया आणि मार्केटिंग हेड
आर्थिक मंदीमुळे फेस्टिव्हल नियोजनावर नक्कीच परिणाम जाणवतो आहे. मात्र, आमच्या टीम्सनी प्रायोजकांना हरतऱ्हेने राजी करण्याचा प्रयत्न केला. फेस्टिव्हलचं यशस्वी नियोजन करण्यास आम्ही कटीबद्ध आहोत.
- देव खन्ना, डीटॉर फेस्ट कोऑर्डिनेटर