कोडिंग करा, नोकरी मिळवा

महेश ढाके, यशवंतराव चव्हाण इन्स्टिट्यूट ऑफ टेक्नॉलॉजी

सध्या २४-३० तास चालणारी कोडिंगची स्पर्धा सर्वच इंजिनीअरिंग कॉलेजांत सुरू आहे. तशीच एक स्पर्धा वसईच्या विद्यावर्धिनी अभियांत्रिकी आणि तंत्रज्ञान कॉलेजमध्ये येत्या १३ व १४ ऑक्टोबरला आयोजित करण्यात आली आहे.

देशभरात सध्या डिजिटल इंडिया आणि मेक इन इंडियाचे वारे वाहताहेत. इंजिनीअर्सना नव्या जमान्यातल्या तंत्रज्ञानाची माहिती मिळावी यासाठी सरकारी तसंच कॉलेज पातळीवर खूप प्रयत्न केले जाताहेत. याचाच एक भाग म्हणून सध्या २४-३० तास चालणारी कोडिंगची स्पर्धा सर्वच इंजिनीअरिंग कॉलेजांत सुरू आहे. तशीच एक स्पर्धा वसईच्या विद्यावर्धिनी अभियांत्रिकी आणि तंत्रज्ञान कॉलेजमध्ये येत्या १३ व १४ ऑक्टोबरला आयोजित करण्यात आली आहे. या कॉलेजमध्ये होणारी ही हॅकॅथॉन १७ ते ३० तास चालणारी असेल. या स्पर्धेसाठी ‘महाराष्ट्र टाइम्स’ मीडिया पार्टनर आहे. मुलांच्या बौद्धिक आणि कोडींगमधील कौशल्याची झलक इथे पाहायला मिळणार आहे. विशेष म्हणजे कोडिंग स्पर्धेचे विजेते ठरणाऱ्यांना नोकरीची संधीही मिळू शकेल.

ह्या स्पर्धेचं मुख्य वैशिष्ट्य असं की यात विद्यार्थ्यांना एकाच वेळेस अनेक थीम्स दिल्या जातील. त्या थीमनुसार विद्यार्थ्यांना त्यांचे प्रोग्रामिंग कोड्स डेव्हलप करायचे आहेत. कोड्स त्यांना अश्या प्रकारचे विकसित करायचे आहेत की ते त्यांना एका विशिष्ट थीम आणि एखाद्या विशिष्ट कार्यक्षेत्र असलेल्या शासकीय, शैक्षणिक, वैद्यकीय इत्यादी यांच्या असलेल्या समस्यांचं उत्तर या कोडिंगमधून द्यायचं आहे. मोबाइल फोन्स, वेब अॅप्लिकेशन्स, ऑटोमेशन टूल्स अश्या विविध सॉफ्टवेअरसाठी ही ३० तास चालणारी स्पर्धा असेल. माहिती-तंत्रज्ञान क्षेत्रात टिकायचं असेल तर समोर काय आव्हानं असतात हे या स्पर्धेतून कळू शकेल. ही स्पर्धा विज्ञान शाखेशी संबंधित सगळ्यांसाठी खुली आहे. विजेत्यांना ४० हजार रुपयांहून अधिक रकमेची बक्षिसं जिंकण्याची संधी आहे. कॉलेजच्या माहिती तंत्रज्ञान व संगणक विभाग यांच्या संयुक्त विद्यमाने ही स्पर्धा आयोजित काण्यात आली असून माहिती-तंत्रज्ञान विभागप्रमुख माधवी वाघमारे आणि संगणक विभागप्रमुख डॉ.स्वप्ना बोर्डे आणि चंदन कोलवणकर सर मार्गदशनाखाली ‘हॅकॅथॉन १७’चं आयोजन करण्यात आलं आहे.