जगभरात विविध क्षेत्रांमध्ये महिलांनी स्वत:चं कर्तृत्व सिद्ध करून दाखवलं आहे. एकीकडे हे चित्र असताना दुसरीकडे मात्र स्त्रियांवर होणारा अन्याय, अत्याचारांच्या घटनाही वाढताना दिसताहेत. आजही अनेक महिलांना आपल्या हक्कांची, अधिकारांची जाणीव नाही. त्यांना त्यांच्या स्वातंत्र्याची जाणीव व्हावी म्हणून 'युनायटेड नेशन वुमन इंडिया' आणि बिझनेस ऑफ आयडिया यांनी 'मुझे हक है' या उपक्रमाची सुरुवात केली. अगदी सर्वसामान्य महिलांपासून ते मोठ्या पदांवर कार्यरत असलेल्या भारतातल्या यशस्वी महिलांची भेट या व्हिडिओतून होते. वेलिंगकर कॉलेजमध्ये उद्घाटन झालेल्या या कॅम्पेनचे निर्माते वेलिंगकर इन्स्टिट्यूटचेच माजी विद्यार्थी आहेत.
या उपक्रमाचा क्रिएटीव्ह प्रोड्युसर सागर ठक्कर व्हिडिओ बनवतानाच्या प्रक्रियेबद्दल म्हणाला की, 'साधारण ५ मिनिटांचा हा व्हिडिओ बनवण्यासाठी आम्ही पूर्ण भारत फिरलो. काश्मिरपासून कन्याकुमारीपर्यंत प्रवास करत असताना कामाचा चांगला उद्देश बघून अनेकांनी आम्हाला मदत केली. प्रतिकूल परिस्थितीवर मात करत सक्षम बनलेल्या अनेक महिलांना भेटण्याची संधी आम्हाला मिळाली.
शिक्षक, पोलिस, अभिनेत्री, खेळाडू अशा अनेक कर्तृत्ववान महिलांची दखल या व्हिडिओमध्ये घेण्यात आली आहे. सानिया मिर्झा, क्रिती सेन, पी.टी.उषा, वहीदा रेहमान, मीरा खन्ना, नीती मोहन, गुल पनाग यासारख्या यशस्वी महिला यात आहेत. आपले हक्क ओळखा, स्वतःला बदला आणि अधिक सक्षम करा असा संदेश या व्हिडिओच्या माध्यमातून देण्यात आला आहे.
या व्हिडिओचं दिग्दर्शन करणारा कार्तिक अय्यर, लेखिका पुजा पुरोहित आम्ही तिघेजण वेलिंगकर इन्स्टिट्यूटचे माजी विद्यार्थी आहोत. वेगवेगळ्या क्षेत्रात काम करत असताना या व्हिडिओच्या माध्यमातून आम्हाला एकत्र काम करण्याची संधी मिळाली.
सागर ठक्कर
क्रिएटिव्ह प्रोड्यूसर
महिला आणि मुलींना त्यांचे अधिकार आणि हक्कांबाबत जागरूक करणं सध्या खूप गरजेचं आहे. कोणतीही भीती न बाळगता किंवा नकारात्मक सामाजिक प्रतिक्रियांचं भय न बाळगता महिलांनी उभं राहायला हवं. चांगला समाज निर्माण करण्यासाठी आम्ही युएन वूमन्सच्या विद्यमानं 'मुझे हक है'च्या कॅम्पेनला साथ दिली आहे. व्हीस्कूलच्या माजी विद्यार्थ्यांनी खूपच चांगला व्हिडिओ केलाय. लिंग विषमतेविरोधात हे पहिलं पाऊल आम्ही उचललं आहे.
उदय साळुंखे, वेलिंगकर इन्स्टिट्यूट, समूह संचालक
संकलन- मेघना अभ्यंकर, रूईया कॉलेज