जूलचा झिंगाट

पूजा कोर्लेकर, एचआर कॉलेज
एकीकडे बँडच्या तालावर थिरकणारे विद्यार्थी आणि दुसरीकडे स्पर्धा जिंकण्यासाठीची चुरस असं उत्साहपूर्ण वातावरण के. सी. कॉलेजमध्ये पाहायला मिळालं. निमित्त होतं ते कॉलेजचा जूल ४.० फेस्टचं. 'अॅपॉकलिप्स' ही यंदाची अनोखी थीम होती. 'महाराष्ट्र टाइम्स' या फेस्टिव्हलचा मीडिया पार्टनर होता.
जूलचं '१४ रिझन्स व्हाय' हा खेळ विशेष आकर्षणाचा भाग होता. शेरलॉक होम्सच्या शैलीचा पुरेपूर अनुभव येथे विद्यार्थ्यांना घेता आला. विद्यार्थ्यांमध्ये असलेल्या टॅलेंटने फेस्टला खरी रंगत चढली. वेगळ्या ढंगात गाणी गाऊन, बिट्बॉक्सिंग करून, नवनवीन वाद्य वाजवून स्पर्धकांनी सगळ्यांच्या मनात घर केलं. या फेस्टची खरी गंमत म्हणजे स्पर्धकांच्या गाण्याच्या बोलीनुसार पूर्ण माहोलचे मूड बदलत होते. तसंच 'अम्युझिकल सिम्फनी' हा एक धुमाकूळ घालणारा बँड इव्हेंट चांगलाच गाजला. आपल्या आवडीच्या बॉलिवूड जोडीच्या हिट गाण्यासोबत स्पर्धकांनी 'डान्सिंग विथ स्टार्स' हा इव्हेंट अगदी हटके बनवून टाकला. याचबरोबर 'स्टार्ट अॅप' या इव्हेंटने विद्यार्थ्यांच्या मनात अॅप निर्माण करण्याची असलेली उत्सुकता वाढवली. विद्यार्थ्यांमधील बुद्धिमत्ता आणि कौशल्य यामुळे इव्हेंट अगदी रंगून गेला. 'जितेंगे भाई जितेंगे जूल जितेंगे', असा सगळीकडेच नारा असताना जय हिंद कॉलेजने 'जूल ४.०' जिंकून बाजी मारली तर एचआर कॉलेजने दुसरा क्रमांक पटकावला. तसंच मिठीबाई कॉलेजने तिसरा क्रमांक मिळवून जूल ४.० मध्ये रंगत आणली.