शो टाइम ऑन

प्रथमेश राणे, आरएडीएव्ही कॉलेज

नकारात्मक विचार बाजूला सारत एकमेकांना प्रोत्साहन देत पुढची वाटचाल केली जाते. हाच माहोल अनुभवण्याची संधी सोफीया कॉलेजच्या 'कलायडोस्कोप १७' या फेस्टिव्हलमध्ये पाहायला मिळणार आहे.

एखाद्या उत्कृष्ट कलाकृतीसाठी दिग्दर्शक, निर्माता सर्वच जबाबदारीने काम करत असतात, सादरीकरणाआधी प्रत्येकावर दडपण असतं. पण नकारात्मक विचार बाजूला सारत एकमेकांना प्रोत्साहन देत पुढची वाटचाल केली जाते. हाच माहोल अनुभवण्याची संधी सोफीया कॉलेजच्या 'कलायडोस्कोप १७' या फेस्टिव्हलमध्ये पाहायला मिळणार आहे. येत्या १६ व १७ सप्टेंबर या दोन दिवसात सोफीया कॉलेजमध्ये 'कलायडोस्कोप' फेस्ट रंगणार आहे. त्याआधी मुंबईतल्या एका नामांकित मॉलमध्ये सोफिया कॉलेजच्या विद्यार्थ्यांकडून फ्लॅशमॉब सादर करण्यात आला. 'महाराष्ट्र टाइम्स' या फेस्टिव्हलचा मीडिया पार्टनर आहे.

सोफीया कॉलेजच्याच प्राची मेहता या विद्यार्थीनीने कोरिओग्राफ केलेल्या या २२ जणांच्या टीमने 'हू रन दी वर्ल्ड?' असं विचारत फ्लॅशमॉब सादर केला. या सादरीकरणाने 'कलायडोस्कोप १७' फेस्टिव्हल यंदा कशी धम्माल करणार आहे हे प्रेक्षकांना दाखवून दिलं. अचानक सुरू झालेल्या फ्लॅशमॉबने प्रेक्षक सुरवातीला गोंधळून गेले, परंतु विद्यार्थ्यांकडून फेस्टिव्हलचे पोस्टर्स झळकताच प्रेक्षकांनी याला भरभरून प्रतिसाद दिला. मुंबई व इतर भागातील ४०हून अधिक कॉलेजांचे विद्यार्थी येथे सहभागी होणार आहेत.