अजय उभारे, विद्यालंकार इन्स्टिट्यूट ऑफ टेक्नॉलॉजी
अभ्यासातून विरंगुळा मिळावा म्हणून वर्षभरात कॉलेजांमध्ये विविध फेस्टिवल्सचं आयोजन केलं जातं. पण यंदा चेंबूरच्या विवेकानंद (व्हीईएस) कॉलेजच्या कम्प्युटर सायन्सच्या विद्यार्थ्यांनी एक वेगळीच शक्कल लढवली. वर्षभर केल्या जाणाऱ्या अभ्यासाचा उपयोग उत्तम प्रकारे करण्याचं या फेस्टिवलच्या आयोजकांनी ठरवलं आणि त्यांचे हे प्रयत्न यशस्वीही झाले. अभ्यास आणि खेळ या दोहोंचा उत्कृष्ट संगम यंदाच्या विवेकानंद कॉलेजच्या 'विहान' या फेस्टमध्ये पाहायला मिळाला. 'ई-वेस्ट' अशी थीम घेऊन आलेला यंदाचा विहान नव्या स्पर्धा, इव्हेंटसह पृथ्वीरक्षणाची शिकवण घेऊन आला होता. 'महाराष्ट्र टाइम्स' या फेस्टिव्हलचा मीडिया पार्टनर होता.
एक वेगळ्या प्रकारचा ट्रेझर हंटचा खेळ यंदा विहानमध्ये पाहायला मिळाला. कम्प्युटर कोडिंगचा वापर करून पुढे जात खजिना शोधण्याच्या या अनोख्या ट्रेझर हंटच्या खेळानं विहानमध्ये विशेष रंगत आणली. तंत्रज्ञानात नेहमीच नवनवीन बदल होतात आणि अशा तंत्रदुनियेत रमणाऱ्यासाठी हा फेस्टिवल खास ठरला. 'गेम ऑफ कोड्स', 'मॅडअॅड', 'पोस्टेरिया', 'ग्रामरगुरु', 'फ्रीझ द मूव्हमेंट', 'मेक इट वर्क' यासारख्या एकाहून-एक आकर्षक स्पर्धांचं आयोजन यंदाच्या विहानमध्ये करण्यात आलं होतं. शिवाय, विविध सेमिनार्सच्या माध्यमातून अनेक नवनवीन गोष्टींविषयी माहिती मिळवण्याची संधी विद्यार्थ्यांना विहानच्या निमित्तानं मिळाली.
दरवर्षीप्रमाणे यंदाही विहानमध्ये विद्यार्थ्यांना त्यांच्या क्षेत्रात यशस्वी वाटचाल करता यावी. शिवाय, ते शिकत असलेल्या गोष्टींपेक्षा नवं जाणून घेण्याची उमेद निर्माण व्हावी म्हणून टीम विहान इंट्रोव्हिवचं आयोजन करतं. यंदा या कार्यक्रमासाठी जी. रमेशकुमार (उद्योजक आणि सल्लागार), रश्मी जोशी (पर्यावरणवादी) आणि निरंजन ओक (सीनिअर रिसर्च स्कॉलर, जेएनयू) यांनी हजेरी लावली होती. त्यांच्या क्षेत्रातील वेगळेपण सांगणारी आणि विद्यार्थ्यांना मार्गदर्शन मिळेल अशा विविध विषयांवर यावेळी चर्चासत्र रंगलं.