विद्यापीठाची वेळ खराब!

परीक्षेला अवघे काही दिवस राहिलेले. आधीच अभ्यासाचं टेन्शन आणि त्यात भर पडली मुंबई विद्यापीठाकडून झालेल्या चुकीची.. हॉलतिकीटवर दिलेलं वेळापत्रक आणि विद्यापीठाच्या वेबसाइटवर दिलेल्या वेळापत्रकात फरक आहे. कला शाखेच्या शेवटच्या वर्षाला असलेल्या सोशिऑलॉजीच्या विद्यार्थ्यांच्या बाबतीत हा प्रकार घडल्याचं दिसून येतंय…

‘अरे विद्यापीठाच्या वेबसाइटवरचं टाइमटेबल बघ आणि हॉलतिकीटवरचं टाइमटेबल बघ. दोन्ही वेगळं आहे.’, ‘गोंधळच आहे, आता काय करायचं? नक्की कोणतं वेळापत्रक बरोबर आहे?’…कला शाखेच्या शेवटच्या वर्षाचं टाइमटेबल हातात पडलं आणि विद्यार्थ्यांमध्ये असे संवाद ऐकायला मिळत होते. मुंबई विद्यापीठाने कला शाखेच्या शेवटच्या वर्षाला असणाऱ्या मुलांना हॉलतिकीट तर वेळेवर दिलं. पण सोशिऑलॉजी विषय असलेल्या विद्यार्थ्यांच्या हॉलतिकीटामध्ये मात्र चूक असल्याचं विद्यार्थी सांगताहेत.

शेवटच्या वर्षाला असणाऱ्या कला शाखेच्या विद्यार्थ्यांची परीक्षा येत्या २४ एप्रिलपासून सुरू होते आहे. परीक्षेला थोडेच दिवस राहिलेले असताना सोशोलॉजी विषयाच्या हॉलतिकीटमध्ये मोठी चूक आढळून आलीय. मुंबई विद्यापीठाने सेमिस्टर सहाचं टाइमटेबल दोन महिने आधीच वेबसाइटवर जाहीर केलं होतं. पण ते वेळापत्रक आणि हॉलतिकीटावर असलेलं वेळापत्रक यात फरक असल्याचं दिसून येतंय. मुंबई विद्यापीठाच्या वेबसाइटवरील वेळापत्रकानुसार सोशोलॉजीचा ‘UASOCA- 605 असा कोड असलेला सोशोलॉजी ऑफ ऑर्गनाईझेशन- पेपर ७’ ( Sociology of organisation) हा पेपर २८ एप्रिलला दाखवला आहे. परंतु हॉलतिकीटावर मात्र हा पेपर २७ एप्रिलला दाखवला गेला आहे. तसंच पेपरच्या कोडमध्येही गोंधळ आहे. त्यामुळे नक्की हा पेपर कोणत्या तारखेला आहे, वेळापत्रक नक्की कुठलं बरोबर मानायचं असा प्रश्न विद्यार्थ्यांना पडला आहे. परीक्षा तोंडावर आलेली असताना मुंबई विद्यापीठानं घातलेल्या या घोळामुळे विद्यार्थ्यांच्या ताणामध्ये भर पडली आहे.

‘मी शेवटच्या वर्षाला असलेला कला शाखेचा विद्यार्थी असून, माझा सोशिऑलॉजी हा विषय आहे. हॉलतिकीट मिळाल्यानंतर मी मुंबई विद्यापीठाच्या वेबसाइटवर दिलेल्या वेळापत्रकाशी ताडून पाहिलं. तेव्हा त्या दोन्ही वेळापत्रकांमध्ये मला फरक दिसून आला. परीक्षा अवघ्या काही दिवसांवर असताना विद्यापीठाने असा घोळ कसा काय घातला आहे? अशा चुकांमुळेच विद्यार्थ्यांचा विद्यापीठावरील विश्वास कमी होऊ लागला आहे’, असं मत एका विद्यार्थ्याने व्यक्त केलं.

हॉलतिकीट आणि मुंबई विद्यापीठाच्या वेबसाइटवर असलेलं वेळापत्रक तपासून पाहून योग्य ते वेळापत्रक लवकरच विद्यार्थ्यांना सांगितलं जाईल. विद्यार्थ्यांचं कोणत्याही प्रकारे नुकसान होणार नाही.
- दिपक वसावे, संचालक, परीक्षा व मूल्यमापन मंडळ