एफवाय प्रवेशाची तयारी सुरू

यंदाही ऑनलाइन प्रवेशपूर्व नोंदणी

म. टा. प्रतिनिधी, मुंबई

मुंबईसह राज्याचे लक्ष बारावी बोर्डाच्या निकालाकडे लागून राहिले असताना, एफवाय प्रवेशासाठी मुंबई विद्यापीठाचेही या निकालाकडे लक्ष आहे. एफवायच्या या ‘मिशन अॅडमिशन’साठी कॉलेजांसह विद्यापीठाचीही जय्यत तयारी सुरू झाली आहे. विद्यापीठाने यंदाही एफवाय प्रवेशासाठी ऑनलाइन प्रवेश पूर्व नोंदणी अनिवार्य केली असून सध्या या प्रक्रियेची तयारी अंतिम टप्प्यात असल्याची माहिती विद्यापीठ प्रशासनाने गुरुवारी दिली. बारावी निकाल जाहीर केल्यानंतर या सर्व प्रक्रियेचे वेळापत्रक जाहीर होणार आहे.

मुंबई विद्यापीठाशी संलग्न कॉलेजांच्या एफवायच्या प्रवेशासाठी सध्या विद्यार्थ्यांची लगबग सुरू झाली आहे. एफवायच्या प्रवेशासाठी नामांकित कॉलेजांच्या यादीतून आपल्या पसंतीच्या कॉलेजमध्ये प्रवेश घेण्यासाठी विद्यार्थ्यांची शोधाशोध सुरू झाली आहे. एफवायची ही प्रवेश प्रक्रिया कशी असेल, याकडे सर्वांचे लक्ष लागून राहिले आहे.

ही प्रवेश प्रक्रिया गेल्या वर्षीप्रमाणेच राबविण्यात येणार असून त्याचे वेळापत्रक लवकरच जाहीर करण्यात येणार आहे. यंदाही विद्यापीठाने ऑनलाइन प्रवेश पूर्व नोंदणी सक्तीचे असल्याचे जाहीर करताना तशा सूचना सर्व कॉलेजांना सूचना दिल्या आहेत.

विद्यापीठाच्या प्रथम वर्ष बीए, बीकॉम, बीएससी, बीएमएम, बीएसडब्ल्यू, बीएससी (आयटी), बीएससी (नॉटिकल सायन्स) बीएससी (होम सायन्स), बीएससी (एव्हिएशन), बीएससी (फॉरेन्सिक सायन्स), बीएससी (हॉस्पिटॅलिटी स्टडी), बीकॉम (बी अँड आय), बीकॉम (ए अँड एफ), बीकॉम (एफ अँड एम), बीएमएस, बीएमएस- एमबीए, बीव्होक, लायब्ररी सायन्स अशा अनुदानित आणि विनाअनुदानित अभ्यासक्रमांसाठी प्रवेशपूर्व ऑनलाइन नोंदणी अनिवार्य आहे.

एफवाय प्रवेशाच्या तयारीसंदर्भात बोलताना विद्यापीठाचे जनसंपर्क विभागाचे उपकुलसचिव लीलाधर बन्सोड म्हणाले की, बारावीचा निकाल जाहीर होताच विद्यापीठ एफवाय प्रवेशाची प्रक्रिया जाहीर करणार आहे. त्याची सर्व प्रक्रिया पूर्ण झाली असून निकालानंतर ही प्रक्रियेचे वेळापत्रक जाहीर करण्यात येणार आहे.

विद्यार्थ्यांसाठी हेल्पलाइन

ऑनलाइन प्रवेश पूर्व नोंदणीसाठी विद्यार्थ्यांना येणाऱ्या अडचणींना उत्तर देण्यासाठी विद्यापीठातर्फे विशेष हेल्पलाइन सुरू करण्यात येणार आहे. प्रवेश प्रक्रिये दरम्यान ही हेल्पलाइन सुरू करण्यात येणार असल्याचे समजते.