नो फ्लॅश प्लीज!

ज्ञानेश्वरी वेलणकर, कॉलेज क्लब रिपोर्टर

कुठेही गेलं की सेल्फी काढायचे, फोटो क्लिक करायचे हे जिकडे-तिकडे पाहायला मिळतं. पण कॉलेज फेस्टिवलला जात असाल, तुमची फोटोग्राफीची ही हौस जरा बाजूलाच ठेवावी लागेल. फोटोंच्या अतिरेकाला कंटाळून फेस्टमध्ये नो फोटो प्लीजचं बंधन घातलं जाण्याची चिन्हं आहेत…

निमित्त काहीही असो, कुठेही आणि कधीही फोटो, सेल्फी काढल्याशिवाय तरुणाईला चैन पडत नाही. पण फोटोग्राफीच्या या अतिरेकाला कंटाळून यापुढेही फेस्टिवल्समध्येही यावर निर्बंध घातले जाण्याची शक्यता आहे. नुकत्याच पार पडलेल्या एनएम कॉलेजच्या ‘उमंग’ फेस्टिवलमध्ये याची एक झलक पाहायला मिळली. फेस्टिवलला विशेष अतिथी म्हणून ज्येष्ठ अभिनेत्री जया बच्चन उपस्थित होत्या. तिथे सतत फोटो काढणाऱ्या अति‘उत्साही’ फोटोग्राफर्सना बच्चन यांनी खडे बोल सुनावले. यंदाच्या ‘मल्हार’ फेस्टिवलमध्येही 'नो फ्लॅश प्लीज'च्या सूचना देण्यात आल्या होत्या. एखादा परफॉर्मन्स सुरू असताना फ्लॅश वापरून फोटो काढण्यावर, व्हिडिओ काढण्यावर किंवा सेल्फी काढण्यावर इथे सक्त मनाई होती.

'उमंग' फेस्टमध्ये खास अतिथी म्हणून आलेल्या जया बच्चन यांची मुलाखत आयोजित करण्यात आली होती. मुलाखत सुरू असताना प्रेक्षकांमधले अर्धेअधिक लोक मात्र त्यांचे फोटो काढण्यात गुंग होते. बच्चन यांना हे सहन झालं नाही. मुलाखत मध्येच थांबवत त्यांनी या ‘उत्साही’ फोटोग्राफर्सना खडे बोल सुनावले. 'भारतीयांनी आधी चारचौघांत कसं वागावं हे शिकायला हवं. नुसता हातात कॅमेरा आला म्हणून सरसकट कोणाचेही फोटो काढत बसणं हे चुकीचं आहे. एखाद्या माणसाच्या विचारांपेक्षा त्याचे फोटो काढणं अधिक महत्त्वाचं आहे का? मला फोटो काढून घेण्याची इच्छा नसेल तर तुम्ही अशाप्रकारे माझ्या मर्जीशिवाय माझे फोटो काढू शकत नाही. कॅमेऱ्याच्या फ्लॅशचा डोळ्यांना त्रास होतो. त्यामुळे मी आजकाल अशा फेस्टना जाणं टाळते', अशा शब्दांत त्यांनी परखडपणे आपलं मत व्यक्त केलं.

‘मल्हार’चा नो फ्लॅश प्लीजचा हा कित्ता अनेक कॉलेज गिरवण्याची शक्यता असून, फेस्टिवल्समध्ये फोटोग्राफीवर बंदी येण्याची शक्यता आहे. नियम असतानादेखील कोणी फोटो काढण्याचा प्रयत्न केलाच तर त्याला आयोजकांच्या कारवाईला सामोरं जावं लागेल. एखाद्या मोठ्या सेलिब्रिटीला बोलावलं असल्यास आता सरळ 'फोटो बंदी'च करावी लागेल असं मत काही आयोजकांनी व्यक्त केलं आहे.