गेम कर डाला!

नवीन उमेदवारांना नोकरीवर घेताना सध्या कॉर्पोरेट कंपन्या वेगवेगळ्या शक्कल लढवतात. उमेदवारांच्या व्हर्च्युअल वावरचा मागोवा घेतला जातो. उमेदवार सोशल मीडियावर किती अॅक्टिव्ह आहे पाहिलं जातं. या सगळ्यामध्ये नवीन भर पडली आहे ती गेम्सची. एखाद्याला ही चेष्टा वाटेल पण बाब खरी आहे.
विविध नामांकित कंपन्या नवीन उमेदवाराला नोकरीवर घेताना नेहमीचे साचेबद्ध प्रश्न विचारण्यापेक्षा गेम्स खेळायला देतात. यामध्ये ऑनलाईन आणि फिजिकल असे दोन प्रकारचे गेम्स असतात. ऑनलाईन गेम्समध्ये मोबाइलवर जे नेहमी गेम्स असतात त्याचा समावेश होतो तर फिजिकल गेममध्ये रुबिक्स क्यूब आणि विविध प्रकारच्या कोड्यांचा समावेश असतो. गेम्सवरुन त्या उमेदवाराची विविध कौशल्य तपासली जातात.
मुख्य म्हणजे कॉर्पोरेट कंपन्यांना त्यांच्या मागणीनुसार, कोणत्या पदासाठी उमेदवार घ्यायचे असतात यावरुन गेम्स बनवून देणारे स्टार्ट अप्सही आहेत. ज्या-त्या पदासाठी उपयुक्त असणारे गेम्स कॉर्पोरेट कंपन्या स्टार्ट-अप्सकडून बनवून घेतात. जेवढ्या मोठ्या पदासाठी गेम तेवढे ते कठीण, क्लिष्ट, गुंतागुंतीचे बनवण्याची जबाबदारी या स्टार्ट-अप्सवर असते. तसंच जेवढे कठीण गेम तेवढी त्या गेमची किंमतही जास्त असते. एकाचवेळी अनेक उमेदवार नोकरीवर घेण्यासाठी गेमिंगचा पर्याय निवडला जातो.
'गेम अधिक प्रभावीपणे खेळण्यासाठी आणि शक्कल लढवून जिंकण्यासाठी उमेदवार जी रणनीती वापरतात ते पाहिलं जातं. तसंच उमेदवाराला आपल्याबरोबर पक्षपात होत नाही, हे कळतं,' अशी माहिती गेम्स तयार करुन देणाऱ्या स्टार्टअप कंपनीमधील कमालिका भट्टाचार्य सांगते.
कंपनीच्या नफ्यासाठी...
अधिकाधिक कार्यक्षम आणि कंपनीला नफा मिळवून देणारे उमेदवार निवडण्यासाठी कॉर्पोरेट कंपन्या अशी शक्कल सध्या लढवतायत. यामुळे त्यांची निर्णयक्षमता, जिंकण्यासाठीची रणनीती यासारखी अनेक कौशल्य कळतात. याचा कंपनीचा फायदा होतो म्हणून हा गेमिंगचा पर्याय निवडला जातो.
- निकेत करजगी, कॉर्पोरेट प्लॅनर