रिद्धी बांदिवडेकर, रुईया कॉलेज
नवरात्रीत परीक्षा आणि नंतर दिवाळीची सुट्टी असल्यामुळे गरबा खेळण्याचा आनंद लुटता आला नाही, म्हणून विद्यार्थी नाराज होते. यावर रुईया कॉलेजने अनोखा तोडगा काढला. कॉलेजने अलीकडे 'रेडिअन्स' नामक गरबा नाइटचं आयोजन केलं होतं. यात नावाजलेले कलाकार आले होते. डान्सर मयुरेश वाडकर, दांडियाचा जल्लोष वाढवायला नैतिक नागदा आणि हियान नैतिक नागदा आले होते. यावेळी प्रत्येक बीटवर रुईयाएटसनी चांगलाच ताल धरला. शिक्षकेत्तर कर्मचारीसुद्धा यात सहभागी झाले होते.
रुईयाचा या शैक्षणिक वर्षातला हा पहिला इव्हेंट होता. त्यामुळे विद्यार्थी विद्यार्थी, शिक्षक आणि शिक्षकेत्तर कर्मचारी यांनी त्याचा मनमुराद आनंद लुटला. यावेळी कॉलेजचा कॉड्रँगल विद्यार्थ्यांच्या उत्साहानं बहरला होता. 'परीक्षा संपली असल्यामुळे विद्यार्थ्यांनी या इव्हेंटचा आनंद लुटला. रुईया स्टुडंट काऊन्सिलने या इव्हेंटसाठी खूप मेहनत घेतली होती', अशी माहिती व्हीपीएमचे प्रमुख डॉ. प्रदीप वाघमारे यांनी दिली.