बॉलीवूड डे, लूक-अ-लाईक डे, कॉमिक डे, ट्रेडीशनल डे हे आणि अशा प्रकारचे भन्नाट डेज साजरे करत काही कॉलेजांनी विद्यार्थ्यांना निरोप दिला. कॉलेजचा अखेरचा दिवस म्हणजेच 'सेंड ऑफ' किंवा 'फेअरवेल' पार्टी देण्याच्या भन्नाट कल्पना कॉलेजेस सध्या आजमावून पाहताहेत. त्याचीच एक झलक खास तुमच्यासाठी...
अजय उभारे, कॉलेज क्लब रिपोर्टर
टाय डे, फ्रेंडशीप डे, व्हॅलेंटाइन डे, ट्रॅडिशनल डे, रेट्रो डे अशा कितीतरी डेजच्या वेळी विद्यार्थ्यांमधील उत्साह ओसंडून वाहत असतो. पण उत्साहालाच थोडी नाराजीची किनार असलेला डे म्हणजे फेअरवेल किंवा सेंडऑफचा दिवस. कॉलेजमधील शेवटच्या वर्षाच्या बॅचला निरोप देण्याचा हा दिवस. मार्चचा महिना संपला की, शेवटच्या वर्षाच्या बॅचच्या फेअरवेल पार्टी किंवा सेंडऑफची तयारी कॅम्पसमध्ये सुरू होते. प्रत्येक कॉलेजमध्ये हा दिवस साजरा करण्याची स्वतःची एक वेगळी पद्धत आहे.
मालाडच्या अथर्व कॉलेज ऑफ इंजिनीअरिंगमध्ये १० ते १३ एप्रिल हे चार दिवस बीईच्या विद्यार्थ्यांसाठी खूपच खास ठरले. शेवटच्या वर्षांत शिकणाऱ्या विद्यार्थ्यांचा यावर्षीचा निरोप समारंभ आनंदाची पर्वणी घेऊन आला होता. निमित्त होतं कॉलेजमधील 'बीई-डेज'या निरोप समारंभ दिवसाचं. बॉलीवूड डे, लूक-अ-लाईक डे, कॉमिक डे आणि ट्रेडीशनल डेचं आयोजन या निमित्ताने करण्यात आलं होतं. मुन्नाभाई आणि सर्किट, ठाकूर आणि गब्बर, वास्तवमधील संजय दत्त या आणि अशा अनेक सिनेभूमिकांच्या वेशभूषेत विद्यार्थी आले होते. कॉमिक डेच्या निमित्ताने मिकी-माऊस, जोकर, शेरलॉक हॉल्म्स, सिंड्रेला असे कार्टुन्सनी कॅम्पसमध्ये कल्ला केला होता.
मुलुंडच्या वझे-केळकर कॉलेज आणि विल्सन कॉलेजच्या विद्यार्थ्यांनी शिक्षकांना फेअरवेल पार्टी देऊन आश्चर्याचा धक्का दिला. प्रत्येक शिक्षकासाठी एक वेगळा मेसेज लिहून शिक्षकांप्रतीच्या भावना व्यक्त केल्या. शिवाय त्यांच्या स्वभावानुसार त्यांना विविध प्रकारचे गिफ्ट्सही विद्यार्थ्यांनी दिले. विल्सन कॉलेजमधील काही शिक्षकही कॉलेज सोडून जाणार असल्या कारणाने ही विशेष पार्टी विद्यार्थ्यांनी आयोजित केली होती. मात्र काही कॉलेजांनी मात्र फेअरवेल करता नकार दर्शवला. अशा विद्यार्थ्यांनी अनधिकृतपणे फेअरवेल पार्टीचा मनसोक्त आनंद लुटला.